«Qazir biz tólemderge ótinish berý belsendiliginiń tómendigin kórip otyrmyz. 2022 jyldyń 11 qarashasyndaǵy jaǵdaı boıynsha, 1,8 mln adam ótinish bergen. Bul ótemaqy alýǵa ótinish bildirgenderdiń jalpy sanynyń 35 paıyzynan az», deıdi Á.О́tembaev.
QDKBQ basshysy ótemaqy baǵdarlamasynyń sharttary men merzimderi týraly aıtty.
«2022 jyldyń 23 aqpanyna deıin teńgemen depozıt ashqan qazaqstandyq bankterdiń salymshylary memleketten 10 paıyz kóleminde ótemaqy alýǵa quqyly ekenin eske salǵym keledi. Ol úshin depozıt ashylǵan bankke ótinish berip, sol arqyly tólemdi alýǵa kelisimińizdi rastaýyńyz qajet. Bul 2023 jyldyń 1 qańtaryna deıin jasalýy kerek. Sondaı-aq depozıtti 2023 jyldyń 24 aqpanyna deıin saqtaý mańyzdy. Sonymen qosa ótemaqy jyl ishinde depozıtte bolatyn eń tómengi soma úshin esepteletinin atap ótkim keledi», dedi ol.
Sóz sońynda Ádil О́tembaev salymshylardy tólemderdi alý quqyǵyn belsendi paıdalanýǵa shaqyrdy.
«Salymshylardyń tólemge ótinish berýge bir jarym aı ýaqyty qaldy, bankke ótinish berýdi jyl sońyna deıin qaldyrmaýdy usynamyn. Onyń ústine bul qıyn emes, kóptegen qazaqstandyq ekinshi deńgeıli bank bul úderisti onlaın túrde uıymdastyrdy. Depozıt ashylǵan banktiń mobıldi qosymshasy bolsa jetkilikti. Tolyq aqparat alý úshin siz árqashan osy bankterge habarlasa alasyz», dedi qor basshysy.
Eske salaıyq, Qazaqstannyń depozıtterge kepildik berý qorynda tólemder 2023 jyldyń 23 aqpanynan keıin júzege asyrylady.
