«Memlekettiń syrttan tartylatyn zaımdar men nesıelerdiń ekonomıkanyń óndiristik, kásipkerlik sektoryn ınvestısııamen qamtamasyz etý maqsatynda alynatyny belgili. Bul sharalar syrttan qaryz alý kólemin arttyrýdy ǵana emes, ekonomıkanyń turaqtylyǵyn da saqtaıdy jáne ony damytýy da tıis. Ol týraly aıtylǵan, «kredıt pen zaım túrinde tartylǵan sheteldik ınvestısııany ekonomıkanyń naqty sektorlaryn damytý baǵytynda paıdalaný, kez kelgen elde óziniń ondy nátıjesin beredi jáne ekonomıkalyq damýdy qamtamasyz etedi» degen ǵylymı negizder de barshylyq», dedi Senator óziniń baıandamasynda.
Onyń aıtýynsha, syrttan kelgen qarajat memlekettiń turaqty ekonomıkalyq damýyn qamtamasyz ete almaıtyn bolsa, ol tek qana syrtqy qaryzdyń únemi joǵary qarqynda óse berýine jáne bolashaqta ony óteýge baılanysty kúrdeli problemalardyń týyndaýyna ákelip soǵady.
«Osy oraıda, qaryzdardy tartý tájirıbesin jalǵastyra otyryp, úkimet, memlekettik qaryzdardyń ósýin jáne oǵan qyzmet kórsetý shyǵyndaryn tejep otyrýdyń mańyzdylyǵyn eskerýi qajet», dedi B.Shelpekov.
Sóıtse de, syrtqy qaryzdyń eldiń ekonomıkalyq qaýipsizdigine áser etetin basty qaterlerdiń qatarynda sanalǵanymen, álemniń kóptegen damyǵan elderiniń tájirıbesine aınalǵan qatynastar, oǵan bir jaqty qaraýǵa bolmaıtyny da anyq.
«Kelisimde qaryz qarajaty 2,5 paıyz jeńildikpen jáne 11, 5 jyl óteý merzimine beriletini jáne tartylatyn qaryzǵa qyzmet kórsetý Qarjy mınıstrligine júkteletini belgilengen. Tartylatyn qaryz qarajaty belgilengen bıýdjet tapshylyǵy jaǵdaıynda óte mańyzdy, qarajat memlekettiń áleýmettik jáne basqa da basym maqsattaryna baǵyttalǵan bıýdjet shyǵystaryn qoldaýǵa múmkindik beredi», dep qosty senator.
Sóz sońynda, ol atalǵan zań jobasyn tolyqtaı qoldaıtynyn, sondaı-aq áriptesterin de qoldaýǵa shaqyratynyn aıtty.
