Atalǵan basqarmanyń málimetine súıensek, 73,7 mıllıon teńgege tumaýǵa qarsy 73 138 doza «Grıppol Plıýs» vaksınasy satyp alynǵan. Oblysta bul vaksına 5 jyldan astam ýaqyt boıy qoldanylyp keledi. Alaıda atalǵan mólsher óńir halqynyń tek 9,8 paıyzyna jetedi. Sol sebepti qosymsha taǵy 2 500 vaksına satyp alynady.
«Qazirdiń ózinde 71 361 myń aqmolalyq tumaýǵa jáne maýsymdyq aýrýlarǵa qarsy ekpe aldy, onyń 8 265-i – 2-10 jas aralyǵyndaǵy balalar. Sonymen birge jabyq úlgidegi mekemelerde (balalar úıi, mektep ınternattary, balalarǵa/múgedekterge arnalǵan ınternattar) – 416 adam, 284 – júkti áıel egildi, al qarttar men múgedekter úıleriniń kontıngenti – 1 040, sozylmaly aýrýlary bar eresekter – 21 342. Bul baǵyttaǵy jumystar odan ári jalǵasady», delingen habarlamada.
Vaksınasııadan keıingi qorǵanys áseri ádette 8-12 kúnnen keıin paıda bolyp, 12 aıǵa deıin saqtalady. Adamnyń jas ereksheligine qaraı vaksınasııadan keıin tumaý vırýsyna qarsy antıdenelerdiń qorǵanys tıtrleriniń deńgeıi 75-95 paıyz bolýy tıis.
«Oblysta esepte turǵan 73 138 adamnyń barlyǵy da ekpe alýy tıis. Bul – sozylmaly aýrýlary bar adamdar, medısına qyzmetkerleri jáne júktiliktiń 2-3 trımestrindegi áıelder, jabyq mekemelerdegi adamdar», dep qosty basqarmanyń baspasóz qyzmeti.
Tumaýdyń aldyn alýdyń eń utymdy joly – vaksınasııa. Halyq arasynda tumaýdyń jappaı taralýyn boldyrmaý jáne organızmde «ımmýndyq qabat» qurylýy úshin jalpy halyqtyń keminde 10 paıyz ekpe alýy qajet. Vaksına tumaýǵa qarsy ımmýnıtettiń joǵary deńgeıin qalyptastyrady.
