Jyljymaıtyn múlik jármeńkesine tek shymkenttikter ǵana emes, Qazaqstannyń kez kelgen qalasynyń azamattary qatysyp, tıimdi baǵada baspana alýyna bolady. «Otbasy bank» uıymdastyryp otyrǵan 4-shi jármeńke 18 qarasha kúni saǵat 09:00-den 20:00 aralyǵynda ótedi. Is-sharaǵa megapolıs ákiminiń orynbasary, turǵyn úı basqarmasynyń ókilderi, bank qyzmetkerleri men qurylys kompanııalarynyń basshylary qatysady. Jármeńkege kelýshiler barlyq saýaldaryna jaýap ala otyryp, ózderine qajetti páterdi tańdaı alady. Ári sol kúni nesıe rásimdep, baspana satyp ala alady.
«Biz barlyq azamattardy jármeńkege qatysýǵa shaqyramyz. Is-shara barysynda «Otbasy bank» salymshylary qurylys kompanııalarynyń turǵyn úı nysandarymen tanysyp, páterlerdi ornalasqan mekenjaıyna qarap tańdaı alady. Sondaı-aq kelýshiler bank qyzmetkerlerinen keńes alyp, esepshotynda jınaǵan qarajatyna saı nebári 15 mınýttyń ishinde nesıege aldyn-ala maquldaý alýlaryna bolady», deıdi «Otbasy bank» AQ Shymkent qalalyq fılıal dırektorynyń orynbasary Erkin Aqynshaev.
Aýqymdy sharada 20-dan astam qurylys kompanııalary ózderiniń sý jańa jáne aldaǵy ýaqytta salynatyn úılerin tanystyrady. Atap aıtsaq olar: BI Group, Bazıs-A, OKS, Batsý, Kanfar, Orda Invest, Otau Group, Art Kurylys, SPK Shymkent, Erıstaıl, Capital City, Altyn Land, Feb group, Erdam, South company, 01 kz bulding jáne Damdes kompanııalary.
Sonymen qatar qurylysshylar jármeńkege kelýshilerge jańa salynǵan turǵyn úıler men kommersııalyq jyljymaıtyn múlik týraly aqparat beredi. Al bank qyzmetkerleri satyp alý joldary týraly aıtyp, nesıe tólemi boıynsha esepteýler jasap, qolaıly turǵyn úı tańdaýǵa kómektesedi. «Otbasy bank» AQ Shymkent qalasy boıynsha fılıalynyń dırektory Dáýren Saýdabaevtyń aıtýynsha, salymshylar bank arqyly qoljetimdi baǵada az mólsherlememen zaem rásimdeı alady.
«Shymkent turǵyndary páter satyp alý maqsatymen jyl basynan beri 27 myńnan astam jańa salym ashty. Otbasy bankiniń jınaqtaýshy shottaryna degen mundaı suranys zaem boıynsha mólsherlemeniń qoljetimdiligine baılanysty. Depozıtte bastapqy jarnaǵa qarajat jınaqtaı otyryp, turǵyn úı satyp alý úshin 3,5%-dan 11,5%-ǵa deıingi mólsherlememen ári qaraı kredıt alý múmkindigi bar. Jalpy bıylǵy jyly Shymkenttegi Otbasy bank fılıalynda 3 621 adam turǵyn úı jaǵdaıyn jaqsartý maqsatymen zaem aldy. Iаǵnı, kún saıyn 11 adam qoljetimdi kredıt rásimdep, armandaǵan baspanasyna qol jetkizip otyr degen sóz», dedi «Otbasy bank» AQ Shymkent qalalyq fılıalynyń dırektory Dáýren Saýdabaev.
Jalpy «Otbasy bank» - elimizdegi turǵyn úı qurylys jınaq júıesin júzege asyratyn birden-bir bank. Uıym Eýropalyq qurylys jınaq kassalary federasııasyna jáne Halyqaralyq turǵyn úıdi qarjylandyrý odaǵyna kiredi. Banktiń jalǵyz aksıoneri – «Báıterek» Ulttyq basqarýshy holdıngi» AQ.
«Eger bankten esepshot ashpaǵan bolsańyz, qam jemeńiz. Turǵyn úıge qarajat jınaýdy búginnen bastaýǵa bolady. Ol úshin tek jeke kýáligińiz bolsa jetkilikti. Esepshot ashýdyń onlaın eki tásili bar. Atap aıtsaq, banktiń resmı saıtyndaǵy beıne qońyraý qyzmeti jáne «Otbasybank» mobıldi qosymshasy arqyly nemese kúni erteń jármeńkege qatysyp, bank qyzmetkerleriniń kómegimen bizdiń salymshy bola alasyz», deıdi fılıal dırektory Dáýren Saýdabaev.
Sondaı-aq jármeńkege alǵash kelgen 30 adamǵa Otbasy bank pen qurylys kompanııalary tarapynan túrli syılyqtar beriledi. Ári baspana tańdap, zaem rásimdegen qala turǵyndaryna kompanııa ókilderi jeńildikter men bonýstar usynbaq. Sondyqtan 18 qarasha kúni, saǵat 09:00 men 20:00 aralyǵynda Shymkent qalasy, Nursát shaǵynaýdany, N.Nazarbaev dańǵylyndy ornalasqan «Kórme» ortalyǵynda ótetin jármeńkege kelińiz. Qurylys kompanııalary men «Otbasy bankiniń» jeńildikterin tıimdi paıdalanyp, baspanaly bolyńyz!
Móldir IBADÝLLAEVA
