ERG quramyndaǵy «Qazhrom» kompanııasy óziniń jaýapkershiligi men áleýmettik baǵdarly kompanııa ekenin pash ete otyryp, 2023-2027 jyldar aralyǵynda qorshaǵan ortaǵa áserdi azaıtýǵa baǵyttalǵan birqatar sharalardy júzege asyrýǵa nıetti ekenin málimdedi.
Kompanııa mindettemeler aıasynda Aqtóbe ferroqorytpa zaýytynyń birinshi jáne ekinshi sehtarynda qatty bólshekterdi 99% tıimdi tazalaıtyn gaz tazartý qurylǵylaryn ornatýǵa, kásiporynnyń ishki qajettilikteri úshin elektr energııasyn óndirý maqsatynda qaıta óńdeý elektr stansııasyn salý arqyly №4 balqytý sehynyń ferroqorytpa gazyn tolyqtaı kádege jaratýǵa, sanıtarlyq-qorǵaý aımaǵynda 100 myńnan astam kóshet egýge, ferroqorytpa óndirisinde óndiriletin kendi tolyqtaı qaıta óńdeýge nıetti.
О́ńir basshysy Eraly Toǵjanov Eýrazııalyq Top basshylyǵymen jasasqan kelissózdiń nátıjesimen bólisti
«Qazaqstanda alǵash ret iri kompanııa óndiriletin kendi tolyqtaı qaıta óńdeýge bet buryp jatyr. Bul el ekonomıkasynyń ósýi, qosymsha jumys oryndary ashylyp, kompanııa men elimizdiń múmkindikteri artady degen sóz. Memorandým tarmaqtaryn iske asyrýǵa múddelilik tanytqany úshin ERG-ge bólek alǵys aıtamyn. «Qazhrom» kompanııasynyń bizdiń óńirge yqpaly zor. Sizderge qarap qalǵan kásiporyndar úlgi alatynyna kúmánim joq», dedi Eraly Toǵjanov.
Bul rette «Eýrazııalyq Top» JShS basqarma tóraǵasy Serik Shahajanov kompanııanyń basty maqsatyn atady.
«Búgin biz Aqtóbe oblysy ákimdigimen ekologııalyq memorandýmǵa qol qoıamyz. Bul qadam óndiristiń ekologııalyq jaǵynan tazalyǵyn jáne bıznestiń áleýmettik jaýapkershiligin arttyrý máselesi Top úshin qanshalyqty mańyzdy ári ózekti ekenin taǵy bir márte dáleldep otyr. Kásiporyndarymyz ondaǵan jyldar boıy jumys istep kele jatqanynan qaramastan, bizdiń maqsatymyz – sehtardy jańǵyrtý, qorshaǵan ortaǵa júktemeni azaıtý jáne qaldyqsyz óndiriske kóshý», dedi «Eýrazııalyq Top» JShS basqarma tóraǵasy Serik Shahajanov.
Aqtóbe ferroqorytpa zaýytyna avtomattandyrylǵan baqylaý júıesin qondyrý jáne basqa da sharalar josparlanǵan. Memorandým sharalaryn iske asyrý ERG kásiporyndaryna álemdik normatıvterge sáıkes bolýǵa múmkindik beredi.
Aqtóbe oblysynyń ákimdigi tarapynan janjaqty qoldaý kórsetiledi, sebebi óndiristik qyzmettiń aımaqtaǵy qorshaǵan ortaǵa antropogendik áserin azaıtýǵa baǵyttalǵan sharalardy júzege asyrý óńir turǵyndary úshin asa mańyzdy.
Aıta ketsek, «Qazhrom» kompanııasy ERG-diń Ekologııalyq strategııasy aıasynda jumys isteıdi, qorshaǵan ortaǵa áserdi tómendetýge baǵyttalǵan aýqymdy jobalardy turaqty iske asyryp keledi.
Máselen, sanıtarlyq-qorǵaý aımaǵynda avtomattandyrylǵan baqylaý júıesin ornatý jobasyn Aqtóbede alǵash bolyp Aqtóbe ferroqorytpa zaýyty men Dóń taý-ken baıytý kombınaty júzege asyrǵan. Investısııanyń jalpy kólemi 500 mln teńge. Qazirgi kúni málimet ERG serverine túsedi, quzyrly mekemeler derekterdi jalpyǵa qoljetimdi derekkózge taratý máselesin pysyqtap jatyr.
Budan bólek, Aqtóbe ferroqorytpa zaýytynyń kásiporyn iske qosylǵannan beri jumys istep kele jatqan №1 jáne №2 balqytý sehtaryn jańǵyrtýdyń alǵashqy nátıjeleri de kórine bastady. «Qazhrom» TUK» AQ damý strategııasyn qaıta qaraı kele, 600 adam jumys isteıtin eski balqytý sehtaryn jappaı, munyń ornyna gaztazartý júıesin jańartý arqyly olardy qaıta qurýdy uıǵarǵan. Osylaısha, Aqtóbe ferroqorytpa zaýytynyń 1943 jyldan beri jumys istep kele jatqan eń alǵashqy peshi – áıgili «Komsomolka» birinshi bolyp jetildirildi.
«Qazhrom» qaldyqtardy óńdeý turǵysynda syrtqy mekemelerdiń qyzmetinen 2020 jyldan beri bas tartty. Quramyna «Qazhrom» kiretin ERG-de jańa ERG Recycling kompanııasy quryldy. Ol kásiporynnyń óndiris qaldyqtarymen baılanysty qyzmetter tobyn oryndaýǵa mamandanǵan. Jylyna 200 myń tonna turaqtandyrylǵan jáne qyrtystalǵan qoj qaıta óńdeledi. 2019 jyly bastalǵan Aqtóbe ferroqorytpa zaýyty tazartylǵan ferrohromynyń qordalanǵan qojdaryn qaıta óńdeý boıynsha strategııalyq mindetterin oryndaýdy jalǵastyryp keledi. 2019 jyly – 50 myń tonna, 2020 jyly – 100 myń tonnany qaıta óńdeý maqsaty sátti júzege asyryldy. 2021 jyly qosymsha 150 myń tonna qoj qaıta óńdeldi. ERG Recycling 2025 jylǵa deıin jyldyq kólemdi 500 myń tonnaǵa jetkizýdi josparlap otyr.
Budan ózge, kompanııa jas býynnyń ekologııalyq kózqarasyn qalyptastyrý sharalaryn júzege asyryp keledi. Aqtóbe men Hromtaýda «Jasyl mektep» jobasy, plastık ónimderimen kúreske baǵyttalǵan «Paket, ket» aksııasy ótkiziledi. Kompanııa Aqtóbede úısiz júrgen janýarlardy tegin zararsyzdandyrýdy qarjylandyrady, sondaı-aq kompanııada úshinshi jyl qatarynan qoqystardy bólek jınaý jobasy oryndalyp keledi.
