16 qarasha kúni tańerteńgi saǵat 10:43-te soqqan qońyraýǵa órt sóndirýshiler birden B.Momyshuly dańǵylyna attanady. 14-úıdegi páterlerdiń birinde shyqqan órtten 5 adam qutqarylady.
Astana qalasy Qoǵamdyq densaýlyq saqtaý basqarmasynyń málimetinshe, órtten keıin tórt naýqas jedel járdem kóligimen №1 kópsalaly qalalyq aýrýhanaǵa jetkizilgen. Zardap shekken eki naýqastyń jaǵdaıy emhanaǵa kelgen kezde ortasha aýyr bolǵan. Qazir toksıkologııalyq bólimshede em qabyldap jatqan olardyń jaǵdaıy jaqsarǵan. Alaıda turǵyndardyń ómirin saqtap qalǵan qutqarýshylardyń biri – О́rt sóndirý qyzmetiniń kezekshi jedel kezekshisi Asqar Zabıkýlınniń jaǵdaıy óte aýyr.
Jasy otyzǵa da tolmaǵan jigit 3-dárejeli kúıik alyp, qazirgi ýaqytta jansaqtaý bóliminde jatyr. О́rt sóndirýshi denesiniń 80 paıyzyn kúıik shalǵan. Taralǵan aqparattarǵa súıensek, qutqarýshy órt shyqqan páterge joǵary qabattan kirý úshin qorǵanysh kıimin sheship, ózimen birge dem alý apparatyn ǵana alǵan. Páterden 80 jastaǵy qarııany, 22 jasar nemeresin jáne kórshi páterde balkonǵa tyǵylyp qalǵan 10 jasar balany qutqarǵan. Al №10 órt sóndirý bóliminiń komandıri Aıan Kempirovtiń (1988 jyly týǵan) jaǵdaıyn dárigerler ortasha aýyr dep baǵalap otyr.
Tótenshe jaǵdaılar departamentiniń habarlamasyna súıensek, órt sóndirý bólimshesine B.Momyshuly dańǵylyndaǵy kópqabatty turǵyn úı kesheninde páter órtenip jatqany týraly habar túskennen keıin órt sóndirýshiler úsh mınýtta shaqyrtý ornyna jetken. «On bes qabatty turǵyn úıdiń 11-qabatynda 50 sharshy metr aýmaqtaǵy páter órtenip jatqany anyqtaldy. Qyzmetkerler birinshi kezekte kómek suraǵan adamdardy qutqarýǵa kiristi. О́z ómirlerin qaterge tikken órt sóndirýshiler bes adamdy qutqardy. Onyń bireýi bala, on adam evakýasııalandy», dep habarlady TJD baspasóz qyzmeti. Sondaı-aq Tótenshe jaǵdaılar departamenti órt shyqqan úıdiń aýlasynda kólikter turǵandyqtan, órt sóndirýshilerge páterge jetý ońaı bolmaǵanyn da aıtyp otyr.
О́rtti sóndirýge barlyǵy TJD-nyń 26 qyzmetkeri men 6 tehnıkasy jumyldyrylǵan. Buǵan qosa Apattar medısınasy ortalyǵynyń úsh qyzmetkeri men bir tehnıkasy oqıǵa ornyna jetedi.
Astana qalasy Tótenshe jaǵdaılar departamentiniń bastyǵy Qýanar Bazarbaev bes adamdy qutqarǵan órt sóndirýshilerdi nagradaǵa usynatynyn habarlady. Degenmen qazirgi tańda adamdardy janqııarlyqpen qutqaryp qalǵan búgingi kúnniń batyrlarynyń ómirin aman saqtap qalý basty maqsat bolyp otyr. Asqardyń aman qalýyn tilep otyrǵan qalyń jurttyń ishinde ata-anasy, kelinshegi men qos kishkentaı balapany da bar.
