Otyrys barysynda Saýda jáne ıntegrasııa birinshi vıse-mınıstri Arman Shaqqalıev bastaǵan delegasııa hattamaǵa sáıkes tapsyrmalardyń oryndalý barysymen tanysty.
Taýarlardy tańbalaý men olardyń qadaǵalanýynyń biryńǵaı operatory janyndaǵy jobalaý ofısiniń basqarýshy dırektory Almat Ismaılov baıandama jasap, kásipkerlerdiń ózderi aıtqan máselelerdiń qalaı sheshiletinin kórsetti, sondaı-aq barlyq taýar toby boıynsha jasalǵan jumys mártebesin atap ótti.
Atap aıtqanda, aıaqkıim ónimderin ımporttaýshylar men óndirýshiler úshin tańbalaý júıesindegi jumys boıynsha tehnıkalyq sheshimder kórsetildi. Buǵan deıin aıaqkıim bıznesiniń ókilderi tańbalaý júıesiniń tehnıkalyq erekshelikterine narazylyq bildirdi, osyǵan baılanysty Biryńǵaı operator kásipkerlermen júıeli kezdesýler ótkizedi jáne osy máselelerdi sheshý maqsatynda jumys júrgizýde. Mysaly, qazir tańbalaýmen jumys isteý úshin katalogke aıaqkıim ataýlaryn engizý júıesi jeńildetilýde.
«Biz úderisterdi ońtaılandyrý boıynsha kelesi jumystardy júrgizdik: taýar túrlerin biriktirý fýnksııasyn qosyp, osylaısha paıdalanýshyny taýardyń 100 túrin tańdaý qajettiginen bosattyq. Sondaı-aq aldyńǵy qujattarǵa negizdelgen derekterdi avtomatty túrde toltyrýdy qamtamasyz ettik, ıaǵnı birdeı derekterdi birneshe ret toltyrmaý úshin derekterdi avtomattandyrý jumystaryn júrgizdik. Júıe endi engizilgen derekterdi este saqtaıdy, paıdalanýshyǵa ony birneshe ret engizýdiń qajeti joq. Invoıs negizinde baqylaý qujattaryna keletin bolsaq, júıeniń tásili men logıkasyn tolyǵymen ózgerttik. Osy ınvoıs negizinde ımporttaýshy tańbalaýda elektrondyq qujattardy jazady. Iske asyrý merzimi – 18 qarasha», dep bólisti Almat Ismaılov.
Onyń ishinde dárilik zattardy qadaǵalaý máselesine erekshe nazar aýdaryldy. Kezdesýde «óndirýshi – dıstrıbıýtor – dárihana» baǵyty boıynsha aınalymǵa qatysýshylar arasynda qabyldaý jáne berý aktisiniń qozǵalysy mysalynda júıeniń tehnıkalyq daıyndyǵy kórsetildi.
Sonymen qatar Biryńǵaı operator barlyq tańbalaý prosesi, sondaı-aq býhgalterlik esep, qoıma qyzmetteri men nesıe jáne bólip tóleý sııaqty bank quraldary bir qarapaıym jáne qoljetimdi júıege biriktiriletin pakettelgen bıznes-sheshim ázirleý boıynsha alǵashqy nátıjelerdi kórsetti.
Saýda jáne ıntegrasııa birinshi vıse-mınıstri Arman Shaqqalıev bastaǵan delegasııa ókilderi suraq qoıyp, Biryńǵaı operator jumysyndaǵy oryndalatyn birqatar mindetti qalyptastyrdy.
Sıfrlyq ekonomıkany damytý ortalyǵy baspasóz qyzmetiniń habarlaýynsha, qazirgi ýaqytta bıznestiń túsiniktemelerin eskere otyryp, sıfrlyq tańbalaý júıesin ońaılatý jáne jaqsartý boıynsha jumys júrgiziledi. Biryńǵaı operator prosesti bıznes úshin barynsha yńǵaıly jáne beıimdelgish etý úshin Qazaqstannyń IT-qaýymdastyǵyn sıfrlyq tańbalaý ekojúıesin birlesip damytýǵa shaqyrdy. Qazirgi ýaqytta
IT-kompanııalarmen kezdesýler ótkizilip, júıelerdi ıntegrasııalaý josparlary pysyqtalyp jatyr.
