...Qarasha aıynyń bas kezi, qasıetti juma kúni edi. Tańerteń azyq-túlik zattaryn almaq bolyp Shymqaladaǵy «Arman» azyq-túlik dúkenine kelgenbiz. Paıdalanýǵa berilgenine kóp bola qoımaǵan saýda ornynda Atabek Ibragımov degen kásipker jigittiń otbasymen qyzmet etetinin burynnan da biletinbiz. Azanǵy abyr-sabyr ýaqyt, kelýshilerdiń de qarasy kóp. Qajetti zattarymyzdy alyp, aqshamyzdy tólemek bolyp kassanyń aldyna kezekke turdyq.
– Apaı, alǵan basqa zattaryńyzdy eseptedim, al bólke nandardy, búgin kún qasıetti juma ǵoı, sonyń qurmetine tegin alasyz, – dedi satýshy aldyna kelgen keıýanaǵa.
Myna sózdi estigen jurt eleń ete qaldy. Bir-birine kúlimsireı qarasyp, kásipker jigitke alǵys aıtyp, rızashylyqtaryn bildirip jatty.
Oılamaǵan jerden tosyn jaıǵa kýá bolǵan biz kásipkerdi sózge tarttyq. Surastyra kele bilgenimiz, júregine ıman uıalaǵan kásipker jigit qoldan kelgeninshe muqtaj jandarǵa árkez qolushyn sozyp turatyn kórinedi. Qasıetti juma kúni tutynýshylarǵa tegin bólke nan taratqanyna ózimiz kýá boldyq. О́rkeni óssin, azamattyń.
Júrekterge ıman uıalaǵanǵa ne jetsin dedik biz de ishteı.
Káribaı ÁMZEULY,
eńbek ardageri, zeınetker
ShYMKENT
