Eýrazııalyq ekonomıkalyq odaq týraly shartqa qol qoıylýyna baılanysty
Qazaqstan halqy Assambleıasynyń el azamattaryna
ÚNDEÝI
Qurmetti otandastar! Azamattar! Búgin biz álemdik deńgeıdegi oqıǵaǵa – Eýrazııalyq ekonomıkalyq odaqty qurý týraly shartqa Belarýs, Qazaqstan, Reseı memleketteri basshylarynyń qol qoıý rásimine kýá bolyp otyrmyz. Eýrazııalyq keńistikte teń quqyqty, kópǵasyrlyq dostyq, ashyqtyq jáne ózara senimdilik qaǵıdattaryna negizdelgen XXI ǵasyrdyń jańa ıntegrasııalyq birlestigi qurylyp otyr. Úsh baýyrlas memleket údemeli modernızasııalaý, turaqtylyq pen ulttyq ekonomıkalardyń básekege qabilettiligin nyǵaıtý, adamdardyń ál-aýqatyn arttyrý úshin ózderiniń áleýetterin biriktirýde. Bolashaqtaǵy ekonomıkalyq qaýipsizdiktiń senimdi negizi qalanýda. Elbasy 20 jyl buryn bastamashy bolǵan Eýrazııalyq ıntegrasııanyń ǵalamdyq ıdeıasy óziniń eleýli pishini men naqty beınesin tapty. Bul Qazaqstan Respýblıkasynyń Prezıdenti Nursultan Ábishuly Nazarbaevtyń eńbegi, yntasy jáne saıası jigeriniń nátıjesi, halyqaralyq bedeliniń múltiksiz moıyndalýynyń dáleli. Shartqa Otanymyzdyń elordasy – Astanada qol qoıylýynyń da ózindik máni bar. Qazaqstan Táýelsizdik jyldary Elbasynyń jetekshiligimen myqty memleketke aınaldy. Bizdiń ishki jalpy ónimimiz jan basyna shaqqanda 14 myń AQSh dollaryna jetti, al altyn-valıýtalyq rezervter 100 mlrd. AQSh dollary mejesine kóterildi. Elimiz asa iri adamı jáne ónerkásiptik áleýeti bar, 170 mln. turǵyny bar naryqty biriktiretin, 20 mln. sharshy kılometrden astam terrıtorııasy nemese jer sharynyń 15% qurlyǵyn quraıtyn orasan zor tabıǵı resýrstary bar qýatty uıymnyń múshesi boldy. Eýrazııalyq ekonomıkalyq odaqty qurý eksporttyq óndiristi, kóliktik ınfraqurylymdy odan ári qarqyndy damytý boıynsha jańa múmkindikterdi ashady, álem muhıtyna shyǵý joldary ashylady. Integrasııadan bolatyn makroekonomıkalyq áser elimizdiń damýynda qarqyndy qadam jasaýǵa, jańa múmkindikterdi ashýǵa jáne ınnovasııalyq ekonomıkanyń ósýine múmkindik beredi. Biraq, eń bastysy, halyqtyń ál-aýqatynyń ósýi úshin orasan zor múmkindikter ashylady. Qazaqstan halqy Assambleıasy Eýrazııalyq ekonomıkalyq odaqty qurýdy tolyǵymen qoldaıdy. Eýrazııalyq ekonomıkalyq odaq álemdik ıntegrasııalar ortalyqtarynyń birine aınalatynyna jáne jetekshi ıntegrasııalyq odaqtardyń úshtigine kiretinine senimdimiz. Qazirdiń ózinde birlestiktiń qyzmetine álemniń kóptegen memleketteri joǵary qyzyǵýshylyq tanytýda. Elbasy «Qazaqstan joly – 2050: bir maqsat, bir múdde, bir bolashaq» atty Joldaýynda Qazaqstannyń eń damyǵan 30 memlekettiń qataryna qosylýy boıynsha qoıǵan mindetterdi oryndaý úshin Eýrazııalyq ekonomıkalyq odaq jumyldyrýshy bastama bolatynyna senimdimiz. Eýrazııalyq ekonomıkalyq odaq bolashaq urpaǵymyzdyń ıgiligi úshin jasalatyn, elimizdiń údemeli damýynyń kepili bolyp tabylatyn qoǵamdyq kelisimdi, el birligin jáne Qazaqstannyń Táýelsizdigin nyǵaıtýǵa jańa serpilis beretinin atap ótemiz! Biz osy boljamdardyń iske asatynyn tabandy túrde atap ótip, Qazaqstan halqyn alǵa jeteleıtin jańa mindetterdi oryndaý úshin Elbasy, elimizdiń Prezıdenti N.Á.Nazarbaevtyń janyna toptasýǵa shaqyramyz. Birge jáne tek alǵa! Qazaqstan halqy Assambleıasy Astana qalasy, 2014 jylǵy 29 mamyr
