Memleket basshysy Qasym-Jomart Toqaev 2022 jylǵy 1 qyrkúıektegi Joldaýynda kezekten tys prezıdenttik saılaý ótkizýdi usyndy. 21 qyrkúıekte osy jyldyń 20 qarashasyna Prezıdenttiń kezekten tys saılaýyn taǵaıyndaý týraly Jarlyqqa qol qoıyldy.
Elimizdiń saılaý ýchaskeleriniń negizgi bóliginde daýys berý jergilikti ýaqyt boıynsha saǵat 07:00-den 20:00-ge deıin ótedi. Sondaı-aq 86 saılaý ýchaskesinde daýys berý jergilikti ýaqyt boıynsha saǵat 06:00-de bastalady.
Aldaǵy prezıdenttik saılaýǵa elimiz boıynsha barlyǵy 10 101 ýchaske tartylady, al 53 elde 68 saılaý ýchaskesi qurylady.
Saılaýshylar tizimine 11 950 485 azamat engizilgen. 4 qarashadan bastap Azamattarǵa tizimderde ózderin tekserýge múmkindik berildi. Daýys berýshiler óz saılaý ýchakesin «JSN boıynsha saılaý ýchaskesin izdeý» aqparattyq servısi arqyly taba alady nemese «1414», «109» call-ortalyǵyna habarlasyp bilýge bolady. Sonymen qatar Smart Astana mobıldi qosymshasy men smartastana_bot Telegram-boty jumys istep tur.
Aıta keteıik, saılaý ýchaskesine jeke kýálikti alyp barý qajet. Sondaı-aq eGov, Kaspi qosymshasyndaǵy sıfrlyq jeke kýálikti kórsetýge bolady.
21 qazan kúni saǵat 18:00-de Qazaqstan Prezıdenttigine kandıdattardy tirkeý aıaqtaldy. OSK kúntizbelik josparyna sáıkes Prezıdenttikke kandıdattardy usyný 23 qyrkúıek pen 11 qazan aralyǵynda ótti. Alty adam prezıdenttikke úmitker retinde tirkeldi.
Prezıdenttikke kandıdattardyń saılaý naýqany 21 qazanda saǵat 18.00-de bastalyp, saılaý kúniniń aldyndaǵy kúni 00.00-de aıaqtaldy. 19 qarashada saǵat 00:00-de kezekten tys prezıdenttik saılaý aldynda tynyshtyq kúni bastaldy.
Únsizdik kúni saılaýǵa baılanysty kez-kelgen úgit-nasıhat jumystaryna tyıym salynady. Daýystardy sanaý daýys berý aıaqtalǵannan keıin birden júzege asyrylady. Ony sanaý uzaqtyǵy 12 saǵattan aspaýy tıis. Daýystardy sanaý aıaqtalǵannan keıin birden hattama jasalady.
Aıta keteıik, 35 shet memleketten saılaýǵa 641 halyqaralyq baıqaýshy akkredıttelgen.
