Kileń kúmis kómeı ánshiler bas qosqan dástúrli án merekesinde Nurjannyń buryn kóp aıtylmaı kelgen «Kóken-aı», «Bátımaǵa», «Ara-aı», «Asyl-aı», «Jan sáýlem», «Nazym» atty shyǵarmalary shyrqaldy. Ár óńirdegi dástúrli óner mektepteriniń ókilderi Nurjannyń nazym-termelerin oryndaýmen qatar, qalaýy boıynsha ózderimen ala kelgen ánderdi de shyrqady.
Baıqaýǵa qatysýshylardy belgili jyraý, folklor zertteýshi Almasbek Almatov bastaǵan qazylar alqasy baǵalap otyrdy.
– Nurjan tek qana ánshi emes qoı. Ol – oryndaýshy jáne óz janynan án shyǵarǵan sazger. Nurjan – balýan, Nurjan – jyrshy. Terme-tolǵaýlary men sheshendik sózderin bylaı qoıǵanda, Nurjan – aqyn. Sondyqtan aldaǵy ýaqytta bul baıqaýdyń aýqymyn keńeıtip, úlken festıval retinde ótkizý kerek sııaqty. Ar jaǵynda balýandar beldesip jatsa, bir jaǵynda osy qazylar alqasynyń quramynda otyrǵan aqyn-dramatýrg Aqylbek Shaıahmettiń Nurjan týraly daıyn turǵan dramalyq týyndysy sahnalanyp jatsa, endi bir jaǵynan dástúrli án baıqaýy men aqyndar músháırasy qyzyp jatsa, aqyn muralarynyń budan da keńirek nasıhattalýyna jol ashylar edi, – dedi Almasbek jyraý.
Oblystyq mádenıet basqarmasynyń basshysy Erlan Qalmaqov bul usynystyń oryndy ekenin, aldaǵy baıqaýlarda múmkindiginshe qaperge alynatynyn aıtty.
Osymen úshinshi ret ótip otyrǵan óner jarysynda bıyl birinshi ret Qostanaı oblysynyń ónerpazy jeńimpaz atanǵanyn da aıta ketý kerek.
Qazylar alqasynyń uıǵarymymen baıqaýdyń bas júldesin Qostanaı oblysy, Fedorov aýdanynan kelgen ónerpaz Arǵynbek Beıbithan jeńip aldy. 1-orynǵa astanalyq jyrshy Uldana Nurtýǵan ıe boldy. Baıqaýǵa Astana qalasynyń atynan qatysqan taǵy bir talantty jyrshy Aıbat Serik júldeli 2-oryndy ıelense, Qaraǵandy oblysy, Shet aýdanynan kelgen Eldos Jaqıev pen almatylyq Aıbıke Tańatarova úshinshi oryndy ózara bólisti. О́nerpazdardyń bárine Nurjan ánderi baıqaýynyń arnaıy músinshesi men aqshalaı syılyq tabys etildi.
– Nurjan Naýshabaıuly atyndaǵy baıqaýdyń bir paıdasy – osy óńirdegi dástúrli mýzykanyń qaıtadan jandanýyna óz septigin tıgizip jatyr. Baıqaýdy turaqty túrde ótkizý arqyly osy topyraqta bar dúnıeni qaıta jańǵyrtyp jatyrmyz. Bir qýantarlyǵy, jyldan-jylǵa qatysýshylardyń da geografııalyq aýqymy keńeıip keledi. Buryn birneshe óńirden ǵana keletin, bıyl Qazaqstannyń túkpir-túkpirinen keldi. Qatysýshylar budan ári izdenip, óz repertýarlaryna Nurjannyń kópshilikke áli de bolsa jetpeı jatqan ánderin qosady degen úmittemiz, – deıdi qazylar alqasynyń múshesi, aqyn Batyrlan Saǵyntaev.
Baıqaýdan keıin áıgili ónerpaz Almasbek Almatov jas jyrshy-termeshilerge sheberlik saǵatyn ótkizdi.
Qostanaı oblysy,
Tobyl qalasy
