«Baskól jurtynyń bazynasy» dep atalǵan maqalada atap kórsetkenimizdeı, Baskól eldi mekenin Ertis ózeninen Belaıa dep atalatyn shaǵyn ózen bólip tur. Ertistiń sol jaq jaǵalaýyndaǵy shabyndyq jerler ónimdi bolǵandyqtan Baskól, Bozsha aýyldarynyń halqy jazda sol jerden shóp shabady. Jergilikti halyq kóp jyldan beri álgi tusta pantondy kópir ornatyp berýdi surap keledi. Belaıa ózeninen ótetin eski parom – búginde jaıylmadan shóp shabatyn aǵaıyn úshin jalǵyz ǵana sý kóligi. Alaıda oǵan minýdiń ózi qaýipti. Sebebi qurylǵynyń jalǵyz ǵana traktordy kóteretin shamasy bar. Jýyqta alǵashqy qar túskende parom ústindegi traktor taıǵanaqtap sýǵa qulap, rýlde otyrǵan traktorıst azamat áýpirimdep aman qalǵanyn da kózimiz kórdi.
Qyrkúıek aıynda Pavlodar oblysynyń ákimi Ábilqaıyr Sqaqov Maı aýdanynyń halqymen júzdeskende baskóldik turǵyndar bul máseleni kóterip, aımaq basshysy nazaryna alatynyn aıtqan edi. Ákim óz ýádesinde turdy. О́ńirdiń 2023-2025 jyldarǵa arnalǵan bıýdjetinde Belaıa ózeni ústinen pantondy kópir turǵyzýǵa 215 mln teńge qarastyryldy.
– Pantondy kópir salý máselesi ótken ǵasyrdyń sonaý 90-ynshy jyldarynan jalǵasyp kele jatyr eken. Sátin salyp, keler jyly qolǵa alynatyny el-jurtty qýantyp otyr. Uzyndyǵy – 60, eni shamamen 9 metrdeı bolatyn kópir qurylǵysy 200 tonna júk kótere alady. Mundaı jańa úlgidegi pantondy kópir Qazaqstandaǵy eń alǵashqysy bolmaq. Elimizde sý kemesi salasyndaǵy qurylys jumystarymen aınalysatyn nebári 3 kásiporyn ǵana bar eken. Bizdiń ákimdik jarııalaıtyn konkýrsty solardyń biri utyp alatyny anyq. Kópir jobasynyń memlekettik saraptamasyna oń sheshim shyǵarylǵanyn aıtqymyz keledi. Endi tek oblystyq máslıhat sessııasynyń hattamasyn ǵana kútip otyrmyz. Odan ári konkýrs jarııalaýǵa tolyq negiz bar, – deıdi Maı aýdanynyń ákimi Aǵybaı Ámirın.
Jańa kópir jınalmaly úlgide salynbaq. Iаǵnı ol jaz ben qysta jumys istep, qysta muz qatqanda jınalyp qoıylady. Bul nysan negizinen Baskól men oǵan qarasty Bozsha, Jańatilek aýyldary úshin mańyzy zor bolatynyn baıqaımyz. Sebebi atalǵan eldi mekenderdiń azamattary Belaıa ózeninen ári asyp, 5,7 myń gektar jerden shóp shabady. Búginde atalǵan aýmaqtyń 2,8 myń gektary sharýalarǵa úlestirilgen, qalǵanyn konkýrstyq úlgide rásimdeý kózdelip otyr. Keleshekte pantondy kópirdi kútip ustaý senimgerlik basqarýǵa berilýi múmkin.
Pavlodar oblysy,
Maı aýdany,
Baskól aýyly
