Talas aýdanynyń turǵyny Erǵazy Sydyqbekov jylyjaıdan 20 tonnaǵa deıin ónim jınaýǵa nıettenip otyr. Qanatqaqty jobanyń sharapatyn kórgen azamat áreket etken adamǵa bereke qonatynyn jaqsy túsinedi. 20 sotyq jerge qyzanaq jáne qııar ornalastyrǵan kásipker aldaǵy ýaqytta da jumys qarqynyn arttyrýǵa nıetti. Búginde qyzanaqty jınaý jumystary qyza túsken.
«Shyntýaıtynda qarapaıym azamattardyń kásip bastaýyna pılottyq jobanyń kóp kómegi tıgenin aıtpaı ketýge bolmaıdy. Jobamdy «Taraz» áleýmettik kásipkerlik korparasııasy» AQ maquldap, kásibimdi júzege asyrý úshin 8 mln teńgeni 2,5 paıyzben berdi. Túsine bilgen adam úshin munyń úlken múmkindik ekeni talas týdyrmaıdy. Búgingi tańda alǵan nesıemizdi tolyq jaýyp tastadyq. «Talas-2020» kooperatıvi tarapynan da aıtarlyqtaı qoldaý kórsetilip otyr. Úsh jyldan beri ónimdi Qarataý men Taraz qalasyndaǵy saýda núkteleri men áleýmettik dúkenderge ótkizýdemiz. Qysqasy, jumysymyzdy júrgizý úshin barlyq jaǵdaı qarastyrylǵan», deıdi E.Syzdyqbekov.
Kásipkerdiń aıtýynsha, jylyjaı kómirmen jylytylady. Kókónisti baptaýmen aınalysatyn kooperatıvtiń agronomy Qanat Aldabergenov jylyjaı jyldyń tórt mezgilinde de jumys isteıtinin, mol ónim beretinin aıtady. Al mundaǵy eńbekkerler ilki sátke de tynym tappaıdy.
Kásiptiń kózin, tabystyń ózin tapqan E.Syzdyqbekov munymen toqtap qalǵysy joq. Osy jyldyń ózinde 10 mıllıon teńge tabys tapqan ol aldaǵy ýaqytta jylyjaı aýmaǵyn 1 gektar alqapqa deıin ulǵaıtýǵa nıetti. Sol arqyly mol tabys tabatynyna senimdi.
Jalpy, qanatqaqty joba boıynsha Talas aýdanyna qarasty Úsharal aýylynda kóptegen jumys júzege asyrylyp jatyr. Búginde úsharaldyq 197 azamatqa jalpy somasy 524,7 mln teńgeni quraıtyn jeńildetilgen nesıe berilgen. Aýyldyqtar mal basyn shamamen eki myńǵa arttyrǵan kórinedi.
Qanatqaqty joba arqyly atqarylyp jatqan jumystar óńir basshysy Nurjan Nurjigitovtiń nazarynan tys qalǵan emes.
«Ár otbasynyń turaqty tabysy bolýy kerek. Biz sol baǵytta jumys atqaramyz. Aýyldyq okrýg ákimderi ózderine artylǵan jaýapkershilikti sezinip, naqty áreket etip, ár aýlanyń ahýalynan habardar bolyp otyrýy qajet. Jobanyń múmkindigin utymdy paıdalanyp, aýyldyqtardyń turmysyn tikteýge kúsh salǵan jón. Sol arqyly biz eldi meken turǵyndarynyń jaǵdaıyn túzeımiz. Joba aldaǵy ýaqytta da júıeli túrde jalǵasyn tabady», deıdi N.Nurjigitov.
О́ńir turǵyndarynyń tabysyn arttyrýdy kózdeıtin qanatqaqty jobanyń ekinshi kezeńi de bastalyp ketti. Ekinshi kezeńge Talas aýdanyna qarasty Oıyq aýyldyq okrýgi enip otyr. Atalǵan aýylda búginde daıyndyq jumystary qyza túsken.
Qysqasy, qanatqaqty jobanyń rahatyn sezinip, kásibinen násibin tapqan eńbekqor azamattarǵa degen qamqorlyq tolastamaq emes. Oblys ákimi Nurjan Nurjigitovtiń aıtýynsha, jylyjaı ıeleriniń birshama shyǵynyn ótep berý boıynsha aldaǵy ýaqytta naqty jumystar qolǵa alynbaq.
Jambyl oblysy,
Talas aýdany
