Shanhaı yntymaqtastyq uıymynyń bas hatshysy Chjan Mın Ortalyq saılaý komıssııasy kezekten tys prezıdent saılaýynyń aldyn ala qorytyndysyn jarııalaǵannan keıin mıssııanyń jumysyn túıindedi. Bas hatshynyń aıtýynsha, 17-20 qarasha aralyǵynda ShYU mıssııasy kezekten tys prezıdent saılaýynda baıqaýshy mıssııasyn atqarǵan. Quramyna 18 baıqaýshy tirkelgen delegasııaǵa 7 memlekettiń, ShYU-nyń hatshylyq ókilderi, óńirlik qurylymdarynyń ókilderi kiripti.
«ShYU ókilderiniń baıqaýy Astana qalasy men Aqmola oblysynyń aýmaǵynda 22 ýchaskeni qamtydy. Mıssııa músheleri bıýlletender daıyndaý, daýys berý jáshikterin plombalaý prosesterine qatysty. Sondaı-aq saılaý komıssııalarynyń múshelerimen, saılaýshylarmen, áleýmettik baıqaýshylarmen keń aýqymda ashyq suhbat qurdyq. Osy prosess kezinde saılaý ótkizýge daıyndyq tártippen, jaqsy uıymdastyrylǵanyn tirkedik. Bári qalypty jaǵdaıda, tártipke saı ótti. Ekinshiden, búkil saılaýshylar úlken belsendilik tanytty», dedi Chjan Mın.
Onyń aıtýynsha, daýys berý resimin júzege asyrýǵa búkil jaǵdaı jasalǵan. «Egde jastaǵy azamattar men múmkindigi bar jandarǵa arnaıy jaǵdaı jasaldy. Saılaý komıssııalarynyń ókilderi daýys berýshiler qoıǵan suraqtarǵa tolyqqandy jaýap berip jatty. Sondaı-aq baıqaýshylar tarapynan suraqtarǵa túsinikteme berdi. Men búkil saılaý ýchaskesine kirgen kezde óz qujatymdy kórsetýge týra kelgenin atap ótýim kerek», degen ShYU bas hatshysy saılaý ýchaskelerinde baıqaý júrgizý kezinde birde-bir kedergige tap kelmegenin erekshe atady.
– Qazaqstan tarapy saılaý prosesine baqylaý júrgizýge qajetti búkil jaǵdaıdy jasady dep aıtýǵa bolady. Sondaı-aq atalǵan saılaýdyń ashyqtyǵy baıqalyp turdy. Bul qorytyndylardyń bárin bizdiń mıssııa músheleri jeke baıqaýlary negizinde shyǵardy. Ulttyq zańnamanyń saılaý legıtımdiligine kúmán keltiretindeı buzylýyn bizdiń mıssııa tirkegen joq. Bizge eshqandaı shaǵym nemese eskertý túspedi. Jeke baıqaýymyz negizinde mıssııa bul saılaýdy ashyq, senimdi ári demokratııalyq dep tanıdy. Qazaqstan Prezıdentiniń saılaýy Qazaqstandaǵy saılaý eldiń ózi qabyldaǵan halyqaralyq mindettemelerge saı ótti, – dedi Chjan Mın.
