Ortalyq saılaý komıssııasynyń deregine súıensek, elimiz boıynsha saǵat 16.00-ge deıin saılaýshylardyń 62,34 paıyzy daýys berip úlgergen. Eń bastysy, daýys berý zań talabyna saı ótti.
Osy joly ákimshilik resýrs degen uǵymnyń artta qalǵanyn baıqadyq. Erikti májbúrleý bolmady, fotoesep suralmady. Kerisinshe, daýys berý kúni men búkil naýqannyń tazalyǵyn kórsetýge basymdyq berildi. Kandıdattardyń saılaýaldy baǵdarlamalary da olardyń tereń daıyndalyp, jaǵdaıdy saraptaǵanyn baıqatady.
Kandıdattar saılaýaldy baǵdarlamalarynda eldiń damý jolynyń barlyq palıtrasyn usyndy. Onyń ishinde reformalar, dástúr, zııaly qaýym, áıelder quqyǵy máseleleri kóterildi.
Bıyl eń bastysy, tańdaý bar. «Bárine qarsymyn» baǵany demokratııalyq tańdaýdyń joǵary satysyna kóterilgenimizdi baıqatady. Daýys berý barlyq halyqaralyq standartqa sáıkes jasalǵan. Eriktilik pen tańdaýdy sezgen azamattar ózderi saılaý ýchaskesinen tabyldy. Soǵan qarap-aq bıylǵy daýys berý úlesiniń joǵary bolatynyn birden ańǵarǵan edik.
Aıbar OLJAEV,
táýelsiz sarapshy
