Uly Dalanyń saltanatty sazy men saǵymdy Saryarqanyń saýmal saǵynyshymen qosa alystaǵy aǵaıynǵa arnap atajurttyń amanatyn arqalaı kelgen sahna sańlaqtarynyń konserttik baǵdarlamasy shettegi qazaqtardyń ulttyq jadyn jańǵyrtyp, ana tili men ádebıetine, ulttyq óneri men tól mádenıetine degen qyzyǵýshylyǵyn arttyrýǵa, tarıhı tamyrynan ajyrap qalmaýyna qam-qaraket jasap, rýhanı turǵyda qoldaý kórsetý maqsatynda uıymdastyrylǵan bolatyn.
Orynbor tórinde ótken mádenı sharanyń máıegi bolǵan «Otandastar qorynyń» prezıdenti Abzal Saparbekuly jáne izgi isterge aıqara qushaq ashyp, birligi men tirligi jarasa qoldaý kórsetken kópultty Orynbor oblysynyń gýbernatory Denıs Vladımırovıch Pasler myrza quttyqtaý sóz sóılep, tóskeıde maly, tósekte basy qosylyp, qońsy qonǵan Qazaqstan men Reseı qashannan-aq ekonomıkalyq turǵyda strategııalyq senimdi seriktes, áleýmettik salada yntymaǵy jarasqan kórshi, al mádenı-gýmanıtarlyq baılanystar baǵytynda baıyrǵy áriptes retinde alys-beris pen barys-kelisti sara jolǵa salǵan, yntymaqtas elder ekendigin aıryqsha atap ótti.
Qurmetti qonaq retinde Reseı Federasııasy prezıdenti janyndaǵy Keńestiń halyqaralyq qatynastar jónindegi memlekettik ulttyq saıasatty aqparattyq qamtamasyz etý komıssııasynyń jaýapty hatshysy - Hýdoleev Andreı Nıkolaevıch jáne ázerbaıjan, bashqurt ulttarynyń mádenı ortalyqtarynyń basshylary qatysty.
Ulan-baıtaq Uly Dalanyń sazdy sálemin asqar Alataýdyń bókterindegi araıly Almatydan Almaty ákimdiginiń qoldaýymen arnaıy alyp kelgen «Sazgen sazy» folklorlyq etnografııalyq ansambli men «Alataý» dástúrli óner teatry ónerpazdary Orynbor ordasyn qazaqtyń ánimen áldılep, kúı kúmbirimen terbetti.
Merekelik kesh qandas baýyrlarymyzdyń jadynda jattalyp, kórermen kóńilinde kópke deıin saqtalary anyq.
