26 jastaǵy Haıme Mýngııa – óte myqty boksshy. Meksıkanyń Tıhýana qalasynyń týmasy 2013 jyldan beri kásipqoı rıngte kúsh synasyp júr. Osy aralyqta 41 kezdesý ótkizip, barlyǵynda jeńiske jetti. 33 qarsylasyn esinen tandyrdy. 2018 jyldyń kókteminde ol amerıkalyq Sadam Álıdi tórtinshi raýndta uryp jyǵyp, birinshi orta salmaqta chempıondyq ataqqa qol jetkizdi. Kezinde Mýngııa Lıam Smıt, Brendon Kýk, Patrık Alottı, Garrı O’Sallıvan, Týreano Djonson, Kamıl Sheremeta, Gabrıel Rosado, Dımıtrıýs Ballard, Djımmı Kellı syndy tanymal boksshylardy ońdyrmaı sabaǵan. Sońǵy ret ol ótken aptada Gvadalaharadaǵy jekpe-jekte Argentınanyń áleýetti boksshysy Gonsalo Gaston Korıany úshinshi raýndta nokaýtqa jiberdi. Haıme – solaqaı boksshy. Onyń boıy – 183 santımetr. Sonymen qatar meksıkalyq marqasqa oń qolymen de jaqsy soqqy jasaı alady.
Bizdiń Jánibek te osal jigit emes. 29 jastaǵy qazaqtyń qaısar uly kásipqoı rıngtegi 13 kezdesýin jeńispen aıaqtap, segiz básekede aıqyn basymdyq tanytty. Joǵarydaǵy jańalyqty estigen bette Jánibek Tvıtterde «Eger Mýngııa kelisse, men ony nokaýtqa jiberemin. Odan keıin kelesi jyldyń aıaǵynda «Kanelomen» kúsh synasýdy kózdep otyrmyn», dep jazdy. Endi qos tarap 15 kún aralyǵynda ortaq mámilege kelýge tıis.
