Qyrǵyz Respýblıkasynyń Shý oblysymen shekaralas ornalasqan aýyl turǵyndary buryndary kóterip júrgen máselelerge endigi bas aýyrtýǵa asa bir qulyqty emes. Qońyrjaı beldeýde mamyrajaı ǵumyr keship jatqan halyq endi kartaǵa enbegen úılerdiń máselesine den qoıyp otyr.
Aıdyń-kúnniń amanynda aýyldaǵy 20 shaqty úı kartaǵa enbeı qalǵan. Kimnen qandaı qatelik ketkenin kim bilsin?! Belgilisi, jergilikti halyq bul máseleniń saǵyzsha sozylmaýyn, der kezinde oń sheshilgenin qalaıdy. Qujatsyz turǵyn úı ıeleri úshin budan asqan másele joq desek te bolady. Olar jer ýchaskelerin rásimdeýge nıetti. Úıleriniń kartaǵa enbegeni úshin qapaly.
Úıleri esepte bolmaǵan soń shetkeri jatqan 18 úı mańyn jaryqtandyrý, jol salý máselesi muńǵa aınalǵany ras. Eldi meken esebinde joq turǵyn úı ıeleri elimizde ógeıdiń kúıin keship otyrǵany úshin kimdi jazǵyratynyn bilmeı dal.
«Máselemizdi sheshýge qandaı da bir yqpaly bolatyn shyǵar degen oımen jergilikti ákimdikke barsaq, olar bizdi aýdandyq ákimdikke jiberedi. Al ondaǵylar qujattardy Astanaǵa joldaǵanyn, alaıda qujattarda qandaı da bir olqylyq bar degen jeleýmen keıin qaıtarylatynyn aıtady. Alaıda qujatta ne durys emes ekenin biz qaıdan bilemiz? Ony bizge eshkim aıtyp jatqan joq», deıdi aýyl turǵyny Maqsat Janetov jaǵdaıdy túsindirip.
Rasynda, Merki aýdanynyń birqatar aýylynda áleýmetti tolǵandyrǵan máseleler az emes. Alaıda Andas batyr aýylyndaǵy ótkir problemany sheshýge kimniń shamasy keledi? Ázirge belgisiz. Úı-jaıy eldi meken kartasyna enbegen el yzaǵa býlyǵyp otyr.
«Men ózi jasy kelgen azamatpyn. Ýaqyt ótken saıyn artqa qaraılaı beremiz. Úıdi balalarǵa durystap tastap ketsem be degen jalǵyz oı meni mazalaı beredi. Sol kúnge qashan jetetinimiz bir Qudaıǵa ǵana aıan. Boıymdy úreı bılep alǵan», deıdi taǵy bir turǵyn Beısenbek Qańtarbaev kókeıdegi oıyn aıtyp.
О́zekti másele kimdi de bolsyn oılandyrmaı, tolǵandyrmaı qoımaıdy. Jergilikti atqarýshy bılik ókilderiniń aıtýynsha, jer telimderi áýelde aýyl sharýashylyǵy maqsatynda berilgen kórinedi. Alaıda aýdandy basqarǵan burynǵy basshylar oǵan qatty bas aýyrta qoımaǵan sekildi. Saldarynan turǵyn úı salatyn azamattardyń qatary artqan. Aldaǵy jyly 290 gektar jer aýyl shekarasyna qosylmaq.
«Jalpy alǵanda, bul másele endi kóterilgen joq. Búginde naqty jumys atqarylyp jatyr. Ár qujat ýaqytqa saı retteledi. Endi Astanadan Ádilet basqarmasyna kelisim kelýin kútip otyrmyz. Sodan keıin máslıhattyń otyrysyn ótkizip, turǵyndardyń qujattaryn rettep beretin bolamyz», deıdi aýdan ákiminiń orynbasary Qaırat Arǵynbaev.
Rasynda da, bul másele búgin kóterilip otyrǵan joq. Turǵyn úılerdiń telimi aýyl shekarasynan asqandyqtan, ázirge ınfraqurylym tartý múmkin emes. Áıtse de jergilikti halyq birinshi kezekte úıleriniń resmı túrde rásimdelgenin qalaıdy. Aýdan ákimi Jorabek Baýbekov osy máseleniń baýyn sheship, halyqtyń alǵysyn ala ma? Ony ýaqyt kórsetedi.
Jambyl oblysy,
Merki aýdany
