– Qazir Qyzylorda qalasynda qurylys qarqyndy júrip jatyr. Jyl saıyn záýlim ǵımarattar sany artyp, jańa aýdandar qatarǵa qosylýda. Memleket basshysynyń Syr eline qoldaýy negizinde oblys ortalyǵynda qala kórkin eselep, ajaryn asha túsetin birneshe záýlim ǵımarattyń irgetasy qalanyp, jańa áleýmettik nysan salý bastamasy sátti júzege asýda. Búgin sol jaǵalaý aımaǵynan irge tepken arendalyq turǵyn úıden páterli bolǵan jerlesterimdi quttyqtaı otyryp, shańyraqtaryńyz shýaqty bolsyn degen tilegimdi jetkizgim keledi, – dedi óńir basshysy.
Qoǵam qaıratkeri Aıtbaı Kósherbaı turǵyndardy qýanyshymen quttyqtady. Baspanaly bolǵandar atynan sóz alǵan bes balanyń anasy Áıgerim Nuradınqyzy perzentteriniń jyly ári keń úıde turyp, laıyqty bilim alǵanyn qalaǵanyn aıtyp, sol armanyna qol jetkizýine sebepker bolǵan el aǵalaryna alǵysyn jetkizdi.
Oblysta «Nurly jer» memlekettik baǵdarlamasy aıasynda 1 764 páterdi quraıtyn 41 turǵyn úı qurylysy júrgizilýde. Onyń ishinde 1 044 páterlik 26 úı jyl aıaǵyna deıin qoldanysqa berilmek. Jalpy, osy jyly óńirde qarjylandyrýdyń barlyq kózi esebinen 683 myń sharshy metr turǵyn úıdi paıdalanýǵa berý josparlanǵan.
Oblysta jańa áleýmettik nysandar boı kóteretin kún de alys emes. Keler jyldyń sońyna qaraı Sultan Beıbarys kóshesiniń boıynan 1myń oryndyq óner ortalyǵy el ıgiligine beriledi. Munda sımfonııalyq, estradalyq jáne ulttyq óner baǵytynda konserttik baǵdarlamalar men túrli formattaǵy qoǵamdyq is-sharalar da ótkiziledi.
Zamanaýı úlgidegi Neke saraıy da keler jyly esigin aıqara ashady. Belgili kásipker, mesenat Marat Dúısenbaevtyń demeýshiligimen qurylysy bastalǵan «Anaǵa taǵzym» ortalyǵy shahardyń ajaryn asha túsedi.
Qyzylorda
