Saýd Arabııasynyń bul jeńisin qazir álemdik BAQ jarysa jazyp jatyr. О́ıtkeni olar chempıonattyń basty favorıti sanalǵany Argentına quramasyn alǵashqy oıynda tobyqtan qaqty. Sondaı-aq arabııalyqtar «albıselesta» ókilderiniń 36 matchqa jalǵasqan jeńilissiz serııasyna núkte qoıdy. Ońtústik Amerıka ókili osymen álem chempıonattarynyń tarıhynda altynshy márte birinshi týrda jeńildi. Olar sońǵy ret 1990 jylǵy dodada Kamerýn quramasyna ese jibergen bolatyn.
Al álem chempıonatyna qatarynan ekinshi ret, jalpy altynshy márte qatysyp jatqan arabııalyqtar fýtbol mýndıalyndaǵy tórtinshi jeńisin toılap jatyr. Saýd Arabııasy 1994 jyly AQSh-ta uıymdastyrylǵan chempıonattyń toptyq kezeńinde Marokko (2:1) men Belgııany (1:0) jeńse, osydan tórt jyl burynǵy Reseıdegi álem birinshiliginde Mysyr (2:1) quramasynan basym túsken edi.
Quramanyń osynaý tarıhı jeńisinen keıin Saýd Arabııasy Koroli Salman ıbn Ábd ál-Ǵazız ál-Saýd 23 qarashany búkil memlekettik demalys kúni dep jarııalady. Sóıtip, fýtbolshylardyń 90 mınýt ishinde jasaǵan tosynsyıynyń arqasynda tutas bir memleket turǵyndaryna bir kúndik demalys berildi. Iаǵnı keshe memlekettik qyzmetkerlerden bastap, jeke sektorda jumys istep júrgender, stýdentter men oqýshylardyń bári demaldy. Sonymen qatar BAQ betterinde Argentına quramasyn jeńgeni úshin Saýd Arabııasynyń árbir fýtbolshysy 2,5 mıllıon eýro kóleminde qarjylaı syıaqy alatyny týraly málimet jarııalandy.
Al sol oıynda Argentına quramasynyń jalǵyz golyn penaltıden soqqan Lıonel Messı áıgili Maradona men Batıstýtany artqa tastap, qatarynan tórt álem chempıonatynda gol soqqan alǵashqy argentınalyq oıynshy atandy. Messı osy jetistiginiń arqasynda tórt álem birinshiliginde daralanǵan Pele (Brazılııa), Ýve Zeeler men Mıroslav Kloze (Germanııa) jáne portýgalııalyq Krıshtıaný Ronaldýmen teńesip aldy. Bes dúrkin altyn dop ıegeri Ronaldý Qatardaǵy chempıonattyń alǵashqy oıynyn búgin Gana quramasymen ótkizedi, eger ol osy matchta nemese basqa da kezdesýlerdiń birinde gol soǵatyn bolsa, bes álem birinshiliginde gol soqqan tarıhtaǵy tuńǵysh fýtbolshy retinde esimi altyn árippen jazylady.
Sonymen qatar fýtbolshylardyń bas básekesindegi Fransııa men Aýstralııa (4:1) arasyndaǵy matchta da birneshe rekordtyń murty buzyldy. Atap aıtqanda, Qatardaǵy mýndıalǵa álem chempıony ataǵyn qorǵaýǵa kelgen «úsh jolaqty» eldiń fýtbolshylary alǵashqy oıynynda-aq iri eseppen jeńiske jetip, taǵy bir erekshe rekord ornatty. Tarıhqa kóz júgirter bolsaq, álem chempıondarynyń birde-biri ózderiniń alǵashqy matchyn iri jeńispen bastamaǵan. Tipti keıingi úsh chempıonattaǵy jeńimpazdar birinshi matchta tegisteı utylǵan.
Aýstralııa qaqpasyna dýbl jasaǵan Fransııa quramasynyń shabýylshysy Olıve Jırý óziniń ulttyq quramadaǵy 50 jáne 51-shi golyn soǵyp, Terrı Anrıdiń jetistigin qaıtalady. 1997-2010 jyldar aralyǵynda Fransııa quramasynyń namysyn qorǵaǵan Anrı 123 matchta alańǵa shyǵyp, 51 gol soqqan. Al 2011 jyly Fransııa quramasynyń jeıdesin kıgen Jırý 51 goldy 115-shi matchynda soqty. Bul tizimde Jırýdy Antýan Grızmann (42 gol) jáne Karım Benzema (37) ókshelep keledi.
Surmergender tiziminde 10-orynda turǵan Kılıan Mbappe keshe óziniń álem chempıonaty tarıhyndaǵy besinshi golyn soqty. Bul degenińiz, 23 jastaǵy PSJ klýbynyń shabýylshysy álemdik dodada bes márte dáldik tanytqan eń jas fransýz fýtbolshysy atandy. Buǵan deıingi rekord Jıýst Fontenge tıesili edi. Ol 24 jasynda 1958 jylǵy álem chempıonatynda jasyndaı jarqyldaǵan edi. Al onyń sol jylǵy chempıonatta 13 dop soǵyp jasaǵan rekordy jýyq mańda jańara qoımaıtyny anyq.
