«Eger úkimetter jańa áleýmettik kelisimshartty shuǵyl túrde júzege asyrmasa, álem barlyq aımaqtardaǵy jumysshylar úshin aýyr zardaptarǵa ákeletin tarıhı ekonomıkalyq quldyraý aldynda tur. Álemge tolyq jumyspen qamtý, laıyqty eńbek jáne jalpy ósip-órkendeýge negizdelgen jańa bıznes úlgileri bar jańa ekonomıkalyq model qajet», dedi Kongress delegattary.
HKK Bas hatshysy laýazymynda óz qyzmetin támamdaǵan Sharan Barroý álemniń 161 elinen kelgen 300 ulttyq kásipodaq ortalyǵynyń basshylaryna sóılegen sózinde jahandyq pandemııa álem buryn-sońdy bolmaǵan adamzat yntymaqtastyǵynyń eń úlken aktisin kórsetkenin atap ótti. Onyń aıtýynsha, kásipodaq qozǵalysy jumysshylardyń quqyqtaryn qorǵaýda burynǵydan beter biriktirilgen. Alaıda pandemııanyń qıyn jyldary da «korporatıvtik ashkózdiktiń» kórsetkishine aınaldy. Bul kezde josyqsyz jumys berýshiler óz artyqshylyǵyn paıdalanyp, jumysshylarmen kelisimshartty buzyp, korporatıvtik retteýdiń joqtyǵyn kórsetti. HKK statıstıkasyna sáıkes álemdegi eń iri 10 korporasııa 2021 jyly shamamen 360 mlrd dollardy quraıtyn jıyntyq tabysyn jarııalady.
«Jumysshylar men olardyń kásipodaqtary úkimetter, jumysshylar jáne bıznes arasynda jańa áleýmettik kelisimshartty talap etýde. Ol turaqty jumys oryndaryn, turaqty jalaqyny, quqyqtardy, teńdikti, ınklıýzıvtilikti jáne áleýmettik qorǵaýdy kórsetýi kerek. Ulttyq jáne halyqaralyq zańnamany jańartý arqyly jumys berýshilerdiń jaýapkershiligin kúsheıtý qajet. Kásipodaqtar Halyqaralyq eńbek uıymynyń standarttary men eńbek salasyn basqarýdaǵy olqylyqtardy joıýǵa arnalǵan jańa Konvensııany qabyldaýyn qoldaıdy», dedi Sharan Barroý.
Ol ulttyq kásipodaq ortalyqtaryna sońǵy birneshe jyldaǵy jemisti jumysy úshin alǵysyn bildirdi.
Kongress delegattaryna Barbados Premer-Mınıstri Mııa Motlı, BUU-nyń Adam quqyqtary jónindegi burynǵy komıssary Merı Robınson jáne AQSh Eńbek mınıstri Martı Ýolsh kásipodaq qyzmetin odan ári damytýǵa sáttilik tiledi. Olar ulttyq kásipodaq ortalyqtarynyń basshylary kótergen máselelerdiń ózektiligin atap ótti.
Qazaqstandyq delegasııanyń basshysy, Qazaqstan Respýblıkasy Kásipodaqtar federasııasynyń tóraǵasy Satybaldy Dáýletalın de Kongress jumysynan alǵan áserimen bólisti. Onyń aıtýynsha, jahandyq kásipodaq forýmyna qatysýshylar kongrestiń alty kúninde yntymaǵy men birligin pash etti.
«Kásipodaqtardyń kúshi – olardyń birliginde, yntymaǵynda, ádildiginde. Baǵdarlamalyq qujattardy talqylaýǵa qatysý, áriptester men pikirlestermen aralasý, tanysý bárimizge paıdaly boldy. Kásipodaqtar federasııasy sheteldik ulttyq kásipodaq ortalyqtarymen jáne Halyqaralyq kásipodaqtar konfederasııasymen tyǵyz yntymaqtastyqta áleýmettik ádildik, laıyqty eńbek ıdeıasyn keńinen nasıhattaý, eńbek quqyqtary men múmkindikteriniń kez kelgen kemsitýshiliksiz teńdigi, halyqaralyq kásipodaq qozǵalysyn odan ári nyǵaıtý jáne damytý úshin kúresti jalǵastyrady», dedi S.Dáýletalın.
Aıta ketý kerek, dástúrli túrde HKK múshe elderdiń kásipodaq kóshbasshylary «eń nashar jumys berýshiler» dástúrli reıtıngin qalyptastyrdy. Bul joly onyń quramyna iri transulttyq kompanııalardyń basshylary kirdi. Eń nashar bastyqtar: P&O Ferries bas dırektory Pıter Hebbltýeıt, Amazon bas dırektory Djeff Bezos, Qantas bas dırektory Alan Djoıs, Emirates Airline jáne Group bas dırektory Ahmed bın Saıd Al Maktým, Starbucks bas dırektory Hovard Shýls, Hancock Prospecting bas dırektory Djına Raınhart.
Eske salaıyq, 17-22 qarasha aralyǵynda Melbýrn qalasynda Halyqaralyq kásipodaqtar konfederasııasynyń V kongresi ótti. 300 ulttyq kásipodaq ortalyqtarynyń ókilderi jáne dúnıe júzinde 200 mln-ǵa jýyq jumysshyny biriktiretin myńnan astam kásipodaq kóshbasshylary men belsendileri jahandyq kún tártibin talqylaý jáne Jańa áleýmettik kelisimshart týraly Deklarasııany qabyldaý úshin jınaldy. Sezdiń birinshi kúninde HKK Bas keńesi Qazaqstan Respýblıkasy Kásipodaqtar federasııasynyń músheligin qalpyna keltirý týraly sheshim qabyldady.
