«Eń aldymen, jergilikti jerlerde tıimdi jumys júrgizilýi kerek. Ákimder jyl saıyn árbir 10 myń turǵynǵa 100 jańa jumys ornyn ashýǵa tıis», degen Prezıdent tapsyrmasy qaı kezde de mańyzdy. О́ńirdiń ónerkásip salasynda oıyp turyp alar orny bar, júıe quraýshy kásiporyn sanalatyn «Super Pharm» farmasevtıkalyq zaýyty qasynan «Ersad – 2021» zaýyty ashyldy. Jańa óndiris oshaǵynyń iske qosylýy jergilikti turǵyndardy jumyspen qamtýǵa sep bolary anyq. Jalpy, zaýyt basshylyǵy sońǵy ýaqytqa deıin shıkizat ataýlyny Qytaı, Reseı elderinen eksporttap júrgen. Endi sol olqylyqtyń orny toltyryldy. Budan bylaı qajetti shıkizatty zaýyt mańyndaǵy fabrıka qamtamasyz etýge qaýqarly.
Zaýyt qyzmetkerleri aýyl sharýashylyǵy, qurylys, jol qurylysy, medısına salalarynda qoldanylatyn toqyma emes materıal óndirýge basa nazar aýdaryp otyr.
«Endi biz shıkizat úshin Reseı men Qytaıǵa táýeldi bolmaımyz. Qıyndyqtar kezdesti. Rýbl kóterildi. Sosyn Qytaıǵa aýystyq. Ol kezde de másele týyndady. Shıkizat jetedi degenshe 3-4 aı ýaqyt ketedi. Jańa bıikke kóterilýimizge pandemııa áser etti. Qıyn-qystaý ýaqytta biz ózge elderden shıkizat ala almadyq. Sol kezde: «Orys pen qytaıdyń qolynan keletin isti biz isteı almaımyz ba?» degen oı keldi. Qajetti qurylǵylardy satyp alyp, eki jarym aıdyń ishinde isti bastadyq. Máselen, jol qurylysynda betonnyń astyna salynatyn mata bar ǵoı. Endi sony biz óndiremiz. Jylyjaılardy jabýǵa qajetti matalardy da shyǵaratyn bolamyz. Jıhazdy qaptaıtyn matalar da bizde óndirilmek. Medısınaǵa qatysty buıymdardy buǵan deıin de aıtyp júrmiz. Ony qaıtalap jatýdyń qajeti joq shyǵar», deıdi «Super Pharm» JShS quryltaıshysy Qaırat Qaımoldaev.
Onyń aıtýynsha, mundaı zaýyt TMD elderinde úsh elde ǵana bar eken. Onyń biri Máskeýde bolsa, ekinshisi – Ýkraınada. Úshinshisi, osy «Ersad – 2021» ǵana. Ras, Máskeýde taǵy birneshe zaýyt bar. Alaıda qýattylyǵy jaǵynan úzdik úshtikke mańaılaı almaıdy.
«Bizde jalǵyz ǵana maqsat bar. Elimizge sheteldik ónimdi kirgizbeýge kúsh salýǵa tıispiz. Bul úshin baǵa baqylaýda bolady. Búginde bizde 600-den astam azamat eńbek etse, olardyń ortasha jalaqysy 180 myń teńgeni quraıdy. Odan joǵary jalaqy alatyn azamattar da barshylyq. Qyzmetkerlerdiń 99 paıyzy jergilikti azamattar ekenin aıta ketken jón. Shóldala, Aısha bıbi sekildi ózge de aýyldardan 6 avtobýs qyzmetkerlerimizdi tasymaldaıdy. Tamaǵy tegin. Olarǵa on úshinshi, tipti on tórtinshi jáne on besinshi jalaqyny da beremiz. Odan bólek syıaqy alady», dedi Q.Qaımoldaev.
Zaýyt qyzmetkerleriniń munaıdyń qaldyǵynan jip, odan mata shyǵarýdy qolǵa alǵanyn da aıta ketken jón.
Oblys ákiminiń orynbasary Qanatbek Mádibektiń aıtýynsha, áýelde jumysyn medısnalyq buıymdardyń 15 túrin óndirýden bastaǵan zaýyt keıinnen 400-ge jeteqabyl farmasvtıkalyq zattarmen elimizdi de, kórshiles memleketterdi de qamtyǵan eken. Osylaısha, turaqty jumys oryndarynyń ashylýyna yqpal etip qana qoımaı, jergilikti qazynanyń da búıirin qompaıta túsken.
Buǵan deıin «Super Pharm» zaýyty toqylmaǵan materıaldan jasalǵan bir rettik sterıldi emes «Nárııa» medısınalyq halaty, hırýrgııalyq kıimder jıyntyǵy, medısınalyq betperdeler, sıstemalyq quraldar jáne ózge buıymdardy óndirý úshin shetelge táýeldi bolsa, endi bul másele tolyqtaı sheshimin tapty. Budan bylaı shıkizatty zaýyt aýmaǵyndaǵy fabrıka qamtamasyz etetin bolady. О́tkir máseleniń ońtaıly sheshilýine pandemııanyń paıdasy tıgenin Q.Qaımoldaevtyń ózi aıtyp qaldy. Qysqasy, pandemııa qos búıirden qyspaǵanda shıkizatqa degen táýeldilik te joıylmas pa edi? Kim bilsin...
Jambyl oblysy,
Jambyl aýdany,
Aısha bıbi aýyly
