Qazaq ádebıetin shetelge nasıhattaý, álem ádebıetiniń kúrdeli problemalary boıynsha pikir almasý jáne qazaq jazýshylary men pýblısısteriniń shetel áriptesterimen shyǵarmashylyq baılanysyn nyǵaıtý, jas jazýshylar men pýblısısterdiń shyǵarmashylyq problemalaryn talqylaý, shetel jazýshylarynyń qazaq ádebıetine degen yqylasyn arttyrý – forým kóterer basty taqyrypqa aınalmaq.
Alǵashqy kitabyn shyǵarý ońaı bolmaǵan ótken kezeńmen salystyrǵanda, shyǵarmashylyq erkindikke qol jetkizgen búgingi ádebıette syrt qaraǵanda kóp qıyndyq joq sekildi qabyldanady. Biraq ár kezeń jas qalamgerge óz qıyndyǵyn tańady. Sondyqtan uıymdastyrýshylar halyqaralyq aýqymdy forýmnyń alańy ádebıettegi búgingi jas qalamgerlerdiń tutas shynaıy beınesin olardyń shyǵarmalary arqyly tanýdyń taptyrmas múmkindigi dep otyr. Qazaq PEN-klýby forým jumysyna qatysýǵa talantty jastar sanatynan (jasy 40-tan aspaǵan) 40-43 qazaq jazýshysyn iriktep aldy, olar óz jumystaryn uıymdastyrý komıtetine aldyn ala tapsyrǵan. Tapsyrylǵan jumystardyń birazy aýdarylyp, semınar jetekshilerine jiberildi. Semınar jetekshileriniń sanatynda Qazaqstannyń alty belgili jazýshysy bar.
Úshinshi Halyqaralyq forýmnyń jumysy «Jas avtorlarǵa qoldaý kórsetý: izdeý, kásibı damytý. Ilgeri damytý» atty máseleni qaýzaıtyn plenarlyq otyryspen bastalyp, munda jas jazýshylardyń baıandamasy tyńdalady. Al «Ádebı bilim: problemalar, sheshim, usynystar» atty dóńgelek ústelde búgingi poezııa, proza, pýblısıstıkadaǵy ortaq máseleler bezbendeledi. Sondaı-aq semınar jetekshileri men meımandar dıspýt júrgizýshileri retinde shaǵyn shoǵyrǵa bólinip, jastar shyǵarmashylyǵyn birlese talqylaıdy. Bul kúni B.Kenjeev, V.Karsev, E.Abdýllaev, E.Ger, M.Shevchenko jáne basqalar sheberlik sabaqtaryn ótkizedi.
Jazýshylar men pýblısısterdiń úshinshi Halyqaralyq forýmyn uıymdastyrý komıtetiniń jetekshisi, Qazaq PEN-klýby prezıdenti Bıgeldi Ǵabdýllın: «Osymen úshinshi ret Qazaq PEN-klýby osyndaı aýqymdy forým ótkizgeli otyr. Buǵan deıingi forýmdarda qazirgi ádebıettiń eń kúrdeli máseleleri jóninde áńgime qozǵaldy.
«Jastar týraly sóz. Jastarǵa – sóz» basqosýynyń moderatorlary bolyp Bıgeldi Ǵabdýllın, Baqyt Kenjeev jáne Júsipbek Qorǵasbek bekitilip otyr. Forýmnyń sońǵy otyrysynan keıin ártúrli atalymdar boıynsha úzdik jumystardyń qorytyndysy habarlanady. Jas jazýshylar men pýblısısterdiń shyǵarmashylyǵyna arnalǵan keleli keńestiń mazmundy ári paıdaly bolatynyna qazirden senim mol. Asa mańyzdy ádebı jıynnyń basty nazaryn jastar shyǵarmashylyǵyna aýdaryp otyrýdaǵy maqsat ta sol – óz eliniń nasıhatshysy bolyp otyrǵan qalamgerdi ýaqytqa laıyq daıarlaý.
ALMATY
