Osy máselege kelgende qazir ozyq tehnologııalar kómegimen atqarylatyn operasııalardyń mańyzy orasan. Bul joly munyń naqty mysaly retinde megapolıste sátimen jasalǵan kezekti tiliksiz otalardyń jaı-japsaryna toqtala keteıik.
Bıyl qarasha aıynyń basynda Almatydaǵy №7 Qalalyq klınıkalyq aýrýhana dárigerleri tize býynyna ártúrli jaǵdaıda zaqym kelgen úsh pasıentke kúrdeli operasııa jasaǵan bolatyn. Eń bastysy, mundaı biregeı operasııalar adam múshesin saqtap qalýǵa múmkindik beredi. Bir jaǵynan MÁMS qarajatyna jasalǵan ınvazıvti otalardy aýrýhana hırýrgteri máskeýlik maman Lev Knellermen yntymaqtastyq sheńberinde atqarǵanyn da aıta ketken jón. Sheberlik dárisine qatysqan Polıjaraqat bólimshesi meńgerýshisi Ramazan Áskerov operasııa jasatqan pasıentter tizelerin ártúrli jaǵdaıda jaraqattaǵanyn aıtady. Mysaly, 18 jastaǵy Kárim tize býyndaryn bir aı buryn grek-rım kúresi jarysynda zaqymdap alǵan. Al 30 jastaǵy Armannyń jaraqattanǵanyna 15 jyl bolǵan. «Jyǵylǵanǵa judyryq» demekshi, sodan beri aýyratyn tizesin taǵy 10 shaqty ret aýyrtyp úlgeripti. Al endi MRT dárigeri bolyp jumys isteıtin 38 jastaǵy kelinshek tizesin úıde jaraqattaǵan. Bulardyń bárine tize býyny artroskopııasy dep atalatyn operasııa jasaldy.
«Eńbekke qabiletti jastaǵy pasıentterdiń úsheýiniń de tizedegi menısk shemirshegi synǵan. Menısk tizeni qorǵap, onyń qozǵalysyn qamtamasyz etedi. Ádette kóptegen dáriger ony alyp tastaıdy. Biz «aǵzany saqtap qalýǵa» baǵyttalǵan operasııalar arqyly menıskti qalpyna keltiremiz», deıdi Ortohırýrgııa bólimshesiniń meńgerýshisi Arnat Baızaqov.
Jalpy, artroskopııa shaǵyn ınvazıvti operasııa bolyp sanalady. Sondyqtan tize býynynda jasalatyn barlyq manıpýlıasııalar kishkentaı eki tilik arqyly júzege asyrylady. Nátıjesinde, emdeý barysynda pasıenttiń qaýipsizdigi tolyq qamtamasyz etilip, aýrýdyń janyna batqany da azaıady. Operasııa naýqastyń tezirek ońalýyna múmkindik beredi.
Almaty onkologııalyq ortalyǵynyń hırýrgteri de alǵash ret uıqy bezi basynyń qaterli isigi bar naýqasqa joǵary tehnologııalyq operasııa jasady.
Uıqy bezi basynyń isigine shaldyqqan 69 jastaǵy áıelge Onkohırýrgııa bólimshesiniń meńgerýshisi Nurlan Baltaev alǵash ret laparoskopııalyq gastropankreatodýdenaldy rezeksııasy, ıaǵnı Ýıppl otasyn jasady. Kespeı jasalatyn operasııa kezinde hırýrg bir mezgilde uıqy beziniń basyn, asqazannyń dıstaldy bóligin, on eki eli ishekti, ash ishektiń bastapqy bóligin, ót joldary bóligin, ót qaby men aımaqtyq lımfa túıinderin alyp tastady.
Buryn mundaı dıagnoz qoıylǵan kezde operasııa dástúrli hırýrgııalyq kesý ádisimen jasalatyn. Onyń pasıent densaýlyǵyna keltiretin zaqymy da az emes. О́ıtkeni otadan keıingi kezeńde tereń jaralar men basqa da kúrdeli asqynýlardyń damý yqtımaldyǵy joǵary bolatyn. Bul joly almatylyq onkologter operasııany shaǵyn ınvazıvti ádis – laparoskopııa arqyly birneshe jerden tesip jasady.
«San jyldar boıy gastropankreatodýodenaldy rezeksııa nátıjeleri keleńsizdeý bolyp, ólim-jitim qaýpi aıtarlyqtaı joǵary túrli asqynýlarmen qatar júrdi. Qazirgi tańda osy operasııanyń mashyqty tehnıkasy, operasııalyq bólmeniń zamanaýı jabdyqtalýy, anestezıologter men reanımatologterdiń joǵary kásibı daıyndyǵy – hırýrgııalyq aralasýdyń osy túrinen bolatyn asqynýlardy, operasııadan keıingi qaıǵyly oqıǵalardy aıtarlyqtaı azaıtty, pasıenttiń ómirin uzartyp, densaýlyǵynda da uzaq ýaqyt boıy jaqsy nátıjesin berip otyr. Pasıent 7 saǵattan astam ýaqytqa sozylǵan operasııa kezinde 200 ml qan joǵaltqanymen, birinshi kúni-aq ózin jaqsy sezindi», deıdi Nurlan Baltaev.
Keıingi 5 jylda Almaty onkologııalyq ortalyǵynda dástúrli kesý ádisi arqyly 92 gastropankretodýodenaldy rezeksııa jasalsa, endigi jerde mundaı operasııalar shaǵyn ınvazıvti ádispen atqarylady.
ALMATY
