Jıyn Túrkistan oblysynyń bıznesmenderimen kezdesýdi jalǵastyrý úshin uıymdastyryldy. Vıse-premer Astanadaǵy memlekettik organdar, kvazımemlekettik sektor, salalyq qaýymdastyqtar men jeńil ónerkásip kásiporyndarynyń ókilderin jınady. Kún tártibinde elde maqtany tolyq óńdeýdi qamtamasyz etý jáne jeńil ónerkásiptiń damýyn qoldaý qaraldy.
Indýstrııa jáne ınfraqurylymdyq damý mınıstrliginiń deregine sáıkes, Qazaqstanda 2022 jylǵy 1 qarashadaǵy jaǵdaı boıynsha 1 396 jeńil ónerkásip kásiporny jumys isteıdi, onyń ishinde 816 – tigin kásiporny, 461 – toqyma óndirisi boıynsha, 119 – bylǵary jáne oǵan qatysty ónimder shyǵarady. Eldiń IJО́-degi jeńil ónerkásiptiń úlesi 0,1%, óńdeýshi ónerkásipte 0,8%-dy quraıdy.
Búgingi tańda otandyq kıim jáne aıaq kıim naryǵy negizinen retteletin satyp alýlar men memlekettik qorǵanys tapsyrysynyń qajettilikterin qanaǵattandyrýǵa baǵyttalǵan.
IIDM Indýstrııalyq damý komıtetiniń tóraǵasy Ilııas Ospanovtyń aıtýynsha, bıyl jeńil ónerkásipti damytýdyń 2022-2025 jyldarǵa arnalǵan jol kartasy ázirlenip, bekitildi. Oǵan shıkizat bazasyn damytý, shıkizatty qaıta óńdeý, jeńil ónerkásiptiń otandyq óndirýshileriniń qýatyn arttyrý, ınvestısııalar tartý, álemdik tájirıbeni engizý jáne eksportty damytý jónindegi sharalar kiredi.
Alaıda jeńil ónerkásip problemalaryn sheshý birden ekonomıkanyń birneshe sektoryna, eń aldymen, AО́K-ke áser etedi. Shıtti maqta óndirýmen dástúrli túrde Túrkistan oblysynyń fermerleri aınalysady. Qazaqstanda jylyna orta eseppen 327 myń tonna maqta óndiriledi, biraq qazaqstandyq kásiporyndarda barlyq shıkizatty qaıta óńdeýge múmkindik joq.
Jeńil ónerkásip kásiporyndarynyń qaýymdastyǵy maqta ónerkásibiniń áleýeti bar dep sendiredi. Tek memlekettik qoldaý sharalary qajet.
Bızneste tıimdi sharalardyń biri – jeńil ónerkásip ónimderin memlekettik satyp alýdyń biryńǵaı pýlyna biriktirý. Sonda otandyq taýar óndirýshiler memlekettik tapsyrysqa kepildi qol jetkize alady.
«Bul jaǵdaıda biz memlekettik kásiporyndarǵa qansha ónim qajet ekenin kóretin bolamyz», dep atap ótti «Qaz Textile Industry» jeńil ónerkásip kásiporyndary birlestiginiń tóraǵasy Gúlmıra Ýahıtova.
О́z kezeginde memlekettik qorǵanys tapsyrysynyń ókili jeńil ónerkásiptiń qazaqstandyq kásiporyndaryna matanyń jáne shyǵarylatyn ónimniń sapasyn arttyrýdy, óndiris tehnologııasyn jaqsartýdy, Qazaqstannyń kúsh qurylymdary úshin arnaıy kıim jetkizetin qazaqstandyq brendti ázirleýdi usyndy. О́z tarapynan memlekettik organdardyń ókilderi tapsyrys berýshiler otandyq taýar óndirýshiler ónimniń laıyqty sapasyn qamtamasyz etken jaǵdaıda, jeńil ónerkásip úshin satyp alýdaǵy jergilikti qamtý úlesin 30-dan 70%-ǵa deıin ulǵaıtýǵa daıyn ekenin málimdedi.
Sondaı-aq keńeste jańa toqyma fabrıkalaryn salý, ınvestorlardy tartý, jeńil ónerkásip kásiporyndaryn AEA basym salalarynyń tizbesine qosý, jeńil ónerkásip kásiporyndaryna preferensııalar berý boıynsha usynystar aıtyldy.
«Memlekettiń mindeti – bıznes úshin qolaıly jaǵdaı jasaý, al ınvestorlar keledi», dep qorytyndylady S.Jumanǵarın.
Sońynda vıse-premer jyl sońyna deıin jeńil ónerkásip salasyn damytý boıynsha barlyq usynystardy shoǵyrlandyrýdy jáne olardy kelesi kezdesýge usynýdy tapsyrdy.
