Osy sózdiń artynda babalardyń amanaty, halyqtyń erteńgi kúnge degen úkilegen úmiti, jalyndy jastardyń bolashaǵy, analardyń tilegi, ákelerdiń batasynyń jemisi jatyr. «Amanat» sóziniń salmaǵy da aýyr. Ata-babamyz mal-múlkin, ómirin amanat dep bilip: «Amanat – adamgershiliktiń ólshemi» degen eken. Endeshe, Prezıdentimiz osyndaı úlken amanatty moınyna tumar etip taqty desek bolady.
Memleket basshysynyń «Ádiletti memleket, ádiletti ekonomıka, ádiletti qoǵam quramyz» degen sózderi jaýapty, ádil bastamalardy kózdeıdi. El múddesiniń bárinen bıik ekenin atap kórsetken Q.Toqaev qolynan is keletin, elge adal qyzmet etetin jandarǵa ǵana ortamyzda oryn bar ekendigin qadap aıtty. Ondaı azamattarǵa qoǵam qashanda qurmetpen qarap, únemi qoldap otyratynyn da ashyq málimdedi. Qazirgi qoǵam árbir mamandyq ıesinen sheberlikti, kásibı biliktilikti talap etedi.
Prezıdent basymdyq bergen basty qundylyqtar – kásibılik, adaldyq, qarapaıymdylyq. Ádil ári shynaıy zań ústemdik qurmaı qoǵamdy jaılaǵan sybaılas jemqorlyqty da joıýdyń máni joq ekenin kórsetti. Elimiz damýy úshin ár adam ózin damytýdy qolǵa alyp, ózin-ózi qamshylaýy kerektigin aıtty.
Prezıdent sózi bilim salasynda eńbek etip júrgen meniń de jigerimdi qaırady. Namys pen ádildikti tý etip, urpaq múddesine berilip jumys isteýge kúsh berdi. Mektep ustazdary keleshek urpaq bilimdi, sanaly, tárbıeli bolýy úshin artylǵan jaýapkershilik júgine qııanat jasamaı adal jumys istep keledi. Muǵalim – qurmet kórsetýge laıyqty mamandyqtyń biri. О́ıtkeni eren eńbegi memleketimizdiń tutqasy bolar urpaqtyń umtylysymen elenedi. Prezıdent senim artqan jastardyń bilimdi, bilikti bolýy mektepke de baılanysty. Bilimdi shákirt bilikti maman bolsa, bilikti maman elge adal qyzmet eteri sózsiz.
Qazirgi kópshilik amanattyń qadirin durys túsinbeı, baǵalamaı júr. Al ata-ájelerimiz amanattyń aldynda aryn da, namysyn da, uıatyn da, saltyn da satpaǵan. Amanatqa qyldaı qııanat jasamaǵan. Endeshe, árqaısymyzǵa babalardyń amanattap qaldyrǵan ulan-baıtaq jerin saqtap, urpaqtan-urpaqqa mura etý jaýapkershiligi júktelse, sol amanatty kóziniń qarashyǵyndaı saqtaıtyn urpaq tárbıeleý – qoǵamnyń, otbasynyń, ustazdyń enshisinde. Qoǵammen de, otbasymen de yntymaqty baılanys jasap, elimizdiń órkendeýine erekshe úles qosqan bilim salasynyń qyzmetkeri de Prezıdent arqalaǵan amanatty birge kóteredi, sózin quptaıdy dep senemin.
Rysjan ShAMURATOVA,
Astana qalasyndaǵy №2 «Daryn» lıseı-mektep-ınternatynyń dırektory
