«Balyq mektebi» jobasy

Almaty oblysy Eńbekshiqazaq aýda­ny­nyń Esik qalasynda jylyna 120 tonna forel ósiretin jańa  balyq sharýa­shylyǵy ashyldy. Búginde basseınderge 100 myń forel shabaǵy jiberildi.

Sharýashylyq basshysy Marlen Tur­syn­áliniń aıtýynsha, jobaǵa jumsalǵan qarjynyń kóp bóligin memleket qaı­tarady. Jalpy, jobany iske asyrý úshin 80 mln teńgege jýyq jeke ınvestısııa salynǵan. Daıyn ónim 2023 jyldyń ekinshi toqsanynda satylymǵa shyǵady dep kútilýde.

«Kópten kútken alǵashqy sharýashy­lyǵymyzdy ashyp jatyrmyz. Mundaı sharýashylyqty elimizdiń ár buryshynan ashýǵa bolady. Sebebi elimizdiń ár óńi­rinde bolýy kerek. Qazir memlekettik baǵ­darlama júrip jatyr. Osy sharýa­shylyqqa jumsalǵan shyǵynnyń 25 paıy­zy ınvestısııalyq sýbsıdııa arqyly qaı­ta­rylady. Basqa shyǵyndardyń da kóp bóligin memleket ótep beredi», dedi kásipker.

Sonymen qatar Marlen eki jyl bu­ryp «Balyq mektebi» jobasyn bas­tap, kásipkerler jáne balyq ósirý­men aınalysqysy keletinderge sharýa­shy­lyqty úıretýdi qolǵa alǵan bolatyn. Osy ýaqytqa deıin 205 adam bilim alǵan. Mektep bitirgen 30 túlek Almaty, Aqtó­be, Shyǵys Qazaqstan, Túrkistan, Jam­byl jáne Jetisý oblystarynda ózderiniń balyq ósirý sharýashylyǵyn ashqan.

«Osyndaı sharýashylyqty ashqysy keletin azamattarǵa «Balyq mektebi» jobasy bar. Kásipke ketetin shyǵyn, ony qalaı júrgizý kerek, memleketten qandaı kómek bar jáne ony alý úshin qandaı qujattar keregin osy jobanyń aıasynda túsindirip beremiz», dedi M.Tursynáli.

Sondaı-aq «Atameken» Ulttyq kásip­­kerler palatasynyń AО́K depar­tamentiniń dırektory Erbol Eseneev Qazaqstandaǵy balyq sharýashylyǵynyń jaǵdaıyn baıandady. Onyń aıtýynsha, syrttan 40 myń tonna balyq keledi. Bul ózimizde óndiriletin mólsherge jýyq­taıdy jáne ony elimizde óndirýge múmkindik zor.

«Qazaqstanda ortasha eseppen 50-55 myń tonna balyq óndiriledi, bul óte az. Salqyndatylǵan jáne muzdatylǵan balyqtyń ımporty 40 myń tonnany quraıdy, onyń somasy – 110 mln dollar. Munsha balyqty elimizde de óndire alamyz jáne óndirýimiz kerek. О́ıtkeni áleýetimiz joǵary. Máselen, taýarly balyq pen balyq ósirý boıynsha sý aıdyndarynyń jalpy aýdany – 125,8 myń ga. Búkil Lıhtenshteın memleketiniń aýmaǵymen salystyrýǵa bolady. Sol sebepti Ulttyq kásipkerler palatasy mundaı jobalardy árdaıym qoldaıdy», dedi E.Eseneev.

Eske sala ketelik, balyq sharýashy­lyǵyn damytýdyń 2021-2030 jyldarǵa arnalǵan baǵdarlamasynyń ındıkatorlary memlekettik qoldaý sharalaryna ǵana emes, sondaı-aq osyndaı kásipkerlerdiń belsendi qyzmetine baǵyttalǵan.