Is-sharany uıymdastyrýǵa Astana qalasynyń qoǵamdyq densaýlyq saqtaý basqarmasy, Salamatty ómir saltyn qalyptastyrý ortalyǵy, JITS ortalyǵy jáne №3 qalalyq emhananyń «Jas Tolqyn» jastar densaýlyq ortalyǵynyń mamandary muryndyq boldy.
Osy kúni aksııa ótetin zaldyń mańynda «Densaýlyq buryshy» uıymdastyrylyp, onda stýdentter men aksııaǵa kelgen qonaqtar ýrolog, psıholog, gınekolog dárigerlerden keńes aldy. Sondaı-aq qant dıabetine, JQTB-ǵa (Juqtyrylǵan qorǵanysh tapshylyǵynyń belgisi) jedel test tapsyrǵan stýdentter de az bolmady. Jastardy salamatty ómir saltyn ustanýǵa shaqyrǵan is-sharada nashaqorlyq saldarymen qatar esirtki saýdasymen aınalysqandarǵa taǵaıyndalatyn qylmystyq jaza jóninde jan-jaqty aıtyldy.
– Búgingi aksııanyń maqsaty jastardy salamatty ómir saltyn ustanýǵa shaqyrý boldy. Negizi osyndaı is-sharalar jergilikti ákimdiktiń bastamasymen josparly túrde uıymdastyrylady. Búgin jastarǵa esirtkiniń zııan ekenin, ony saýdalaǵandarǵa zań úkimi qatań ekenin barynsha túsindirdik. Qazir jastar nashaqorlyqtyń qandaı qıyndyqqa aparatynyn áleýmettik jeliden biledi dep oılaımyz. Sol úshin de jastar esirtkiden bas tartýy kerek. О́ıtkeni sıntetıkalyq esirtki tutynǵandar óziniń zııandy zattyń jetegine qalaı ergenin bilmeı de qalady. Al zań boıynsha esirtki saýdasymen aınalysqandar, ıaǵnı esirtki saqtap, satqan nemese jarnamalaǵandar jazadan qutylmaıdy. Mine, osylaısha biz jastarǵa nashaqorlyqtan keletin qaýip-qaterlerdi barynsha túsindirdik dep oılaımyz, – deıdi Astana qalasy polısııa departamenti esirtki bıznesine qarsy is-qımyl basqarmasynyń nashaqorlyqtyń aldyn alý, vedomstvoaralyq úılestirý bóliminiń basshysy Sergeı Ilınov.
Izin ala JITS ortalyǵynyń mamany Ajar Turymova stýdentterge JITS-tiń belgileri jáne saqtaný joldary týraly aıtyp berdi. Spıker JITS týraly bilmeıtin jastardyń kóp ekenin eske salyp, aýrýdyń osy túri nashaqorlarǵa qan arqyly taraý qaýpi bar ekenin túsindirdi. Osy tusta Astana qalasy boıynsha salamatty ómir saltyn qalyptastyrý ortalyǵynyń dırektory Qanat Hamzın jastar arasynda nashaqorlyqtyń aldyn alý jumystary ózekti ekenin eskertti.
– 26 maýsym esirtki men nashaqorlyqtyń zańsyz aınalymyna qarsy halyqaralyq kún dep belgilengen. Biraq biz mundaı aksııalardy bir kúnge telip qoımaı, jylyna birneshe ret uıymdastyramyz. Qazir esirtki qoldanatyndardy bylaı qoıǵanda, jastar arasynda esirtki saýdasymen aınalysatyndar kóbeıip barady. Zańsyz áreketke batyly jetkenderge jaza qatań. Jastar sony uǵynsa eken deımiz. Stýdentter esirtkiniń zııany jáne qylmystyq jaýapkershilik týraly aqparatty mamandardyń ózinen estigen soń, túısigine jetedi dep oılaımyz. Bizdiń ortalyq balabaqshadan bastap, mektep, kolledj, joǵary oqý oryndarynda jıi kezdesetin aýrýlardyń aldyn alý sharalaryn ótkizedi. Mysaly, Dúnıejúzilik densaýlyq saqtaý uıymynyń derekterine súıensek, jastar, tipti oqýshylar arasynda elektrondy temeki tutynatyndar kóbeıgen. Endi osyǵan ata-ana nemese mektep jaýapty dep shektelmeı, qoǵam bolyp yqpal etýimiz kerek dep oılaımyn, – deıdi ol.
Is-sharada quqyq qorǵaý jáne medısına salasynyń mamandary stýdenttermen erkin pikir almasyp, suraqtaryna jaýap berdi.
