Kezdesý barysynda Qazaqstan, Ázerbaıjan, Grýzııa jáne Túrkııa syrtqy saıası vedomstvolarynyń basshylary men kólik salasyndaǵy mınıstrleri jumys isteý jaǵdaılaryn jańǵyrtý arqyly halyqaralyq kólik marshrýttaryn jedel damytý jónindegi sharalar keshenin ázirleý boıynsha birqatar máseleni qarady. Jıynda Kaspıı-Qara teńiz óńirinde kooperasııany nyǵaıtý úshin praktıkalyq qadamdar ázirlendi.
Mınıstr M.Tileýberdi Transkaspıı halyqaralyq kólik baǵytyn (THKB) jáne «orta dálizdi» damytý jónindegi qazaqstandyq taraptyń tásilderin baıandady. «Qazaqstan búkil Kaspıı óńiriniń tranzıttik-kóliktik áleýetin neǵurlym tolyq ashý úshin syndarly ózara is-qımyl men ashyq dıalogqa beıimdelgen», dedi SIM basshysy.
Indýstrııa jáne ınfraqurylymdyq damý mınıstri Q.О́skenbaev qatysýshylardyń nazaryn júkter tasymaldaý júktemesi birneshe ese ósken Transkaspıı dálizin odan ári damytý jóninde naqty sheshimder qabyldaý qajettigine aýdardy. «Osy jyldyń 10 aıynda Aqtaý jáne Quryq teńiz porttary arqyly THKB boıynsha shamamen 1,5 mln tonna júk tasymaldanyp, bul ótken jyldyń kórsetkishterinen 2 ese asyp tústi», dep atap ótti Q.О́skenbaev.
Qatysýshylar kólik áleýetin damytý jónindegi negizgi baǵyttarǵa degen kózqarastardyń birligin qanaǵattanýshylyqpen atap ótti jáne úkimettik deńgeıde tikeleı baılanystardy jandandyrýǵa ózara múddeliligin rastady.
Is-shara qorytyndysy boıynsha barlyq taraptar kelisilgen jumys prınsıpterin, sondaı-aq naqty parametrleri, iske asyrý merzimderi jáne jaýapty oryndaýshylary bar naqty jobalardy kózdeıtin 2022-2027 jyldarǵa arnalǵan «tar» oryndardy sınhrondy joıý jáne «orta dálizdi» damytý jónindegi Jol kartasyna qol qoıdy. Ýaǵdalastyqtardy iske asyrý 2025 jylǵa qaraı dáliz boıynsha ótkizý qabiletin jylyna 10 mln tonnaǵa deıin arttyrýǵa múmkindik beredi.
