Bul jolǵy ulyqtaý rásimi ózgeshe ótti. Qoǵam belsendileri, úkimettik emes uıym ókilderi, jastar, sport, densaýlyq, aýylsharýashylyq, mádenıet qyzmetkerleri, ǵalymdar shaqyrylypty. Sheneýnikten azamattyq qoǵam ókili basym boldy.
Ulyqtaý rásimi erkin formatta ótti. Aqorda ótkizetin is-sharalarda telefondy alyp qalatyn, bul sharada shekteý bolmady. Men bul sharaǵa kópbalaly analardyń ókili retinde shaqyrtý aldym. Prezıdenttiń Konstıtýsııaǵa qol qoıyp ant berý sáti, týdy súıip, táý etýi erekshe tolqytatyn sát eken.
Prezıdent eń alǵashqy Jarlyǵyn aýyldy damytýǵa arnady. El besigi – aýyl kórkeıse Qazaqstan ekonomıkasy da damıtyny sózsiz. El halqynyń 40 paıyzy tirlik keshetin aýyldyń otyz jylda túp-tamyry úzilýge shaq qaldy. Prezıdent aldaǵy bes jylda aýyl eńsesin tikteıdi dep ýáde berdi.
Ulyqtaý rásiminen keıin, «Qazaqstan» konsert zalynda merekelik konsertke bardyq. Roza Rymbaeva men Dımashtan basqa, ánshiler quramy jasaryp-jańarǵan eken. Ánshilermen birge zaldaǵy eki myńǵa jýyq kórermen oryndarynan tik turyp, «Atameken», «Kók týdyń jelbiregeni» ánderin qosylyp shyrqady. Halyq rýhty kóteretin, biriktiretin dúnıelerge shóldep qalypty. Ulyqtaý rásimine barlyq óńirden kelgen qatysýshylar jańa kúsh-jigerge baıyp, rýhymyz kóterilip qaıttyq.
Lázzat QOJAHMETOVA,
Prezıdent janyndaǵy Ulttyq quryltaı múshesi
Qaraǵandy oblysy
