Polısııaǵa 9-synyp oqýshysynyń anasy habarlasyp, qyzynyń mektepte «iPhone 10» markaly telefonyn joǵaltyp alǵanyn aıtqan. Oqıǵa ornyna quramynda arnaıy úıretilgen ıtterdi ertken kınologter, polısııa qyzmetkerleri jiberildi. «Graf» atty qyzmettik ıt ıis arqyly telefondy qar astynda jatqan jerinen taýyp aldy. Mektep oqýshysy gadjetin qaltasyna salyp, jolda baıqaýsyzda túsirip alǵan eken. Osylaısha, 6 jyldan astam qyzmet etetin qyzmettik-izdestirý ıtiniń kómegimen qysqa merzimde telefon tabylyp, ıesine qaıtaryldy.
Jyl saıyn qoldanysqa zamanaýı tehnologııalardyń enýine qaramastan, qyzmettik ıt áli de polısııa jumysynda suranysqa ıe. Janýardyń sezim músheleri (tumsyǵy men qulaǵy) eshbir tehnıkanyń kúshi jetpeıtin zattardy ıiskep, estı alady. Astana qalasy polısııa departamentiniń Kınologııalyq qyzmeti ortalyǵynda 50-den astam ıisshil ıt bar. Shahardyń ár aýdanynda táýlik saıyn kınolog mamandar kezekshilik etedi. Olar iz kesý baǵyty boıynsha adam óltirý, urlyq, azamattardyń joǵalýy sııaqty jumystarǵa tartylady. Keıde shuǵyl shaqyrtýlar túsip, kınologter esirtki qylmysyna qatysty oqıǵalardyń basy-qasynda júredi. «Jarylǵysh zat qoıylǵan» degen aqparat tússe, sol jaqtan tabylady. Barlyq jaǵdaıda aqparat jalǵan bolyp shyǵady. Biraq ǵımaratty tolyq tekserip shyǵý – kınologterdiń mindeti. Budan bólek, aýqymdy mádenı-sporttyq is-sharalar ótkizilmes buryn nysan jiti tekseriledi. Kúndiz-túni, demalys kúnderi de aıaqtarynan tik turyp, óz mindetterin minsiz oryndaýǵa atsalysyp júr.
Kınologııalyq qyzmeti ortalyǵyndaǵy ıtter negizgi 4 baǵytqa jumyldyrylady. Budan bólek, shabýyldaýshy, kúzetshi, patrýldik baǵyttaǵy ıtter de bar. Sáıkesinshe, kınologter sol baǵytta daıyndaıdy, úıretedi. Negizgileri – jarylǵysh zatty anyqtaıtyn, esirtkini izdeıtin, iz kesý jáne odrologııa baǵyty.
Itterdiń negizgi qyzmettik tuqymy – ovcharka. Bul ońaı úıretiletin ámbebap ıtter, olar kez kelgen tapsyrmany oryndaı alady. Qyzmetke kirispes buryn olar adamnan da, janýardan da shydamdylyq pen joǵary zeıindi qajet etetin kúndelikti jattyǵýlardy birge oryndaıdy.
