Boks keshin uıymdastyrýshy menedjer Zııa Alıevtiń aıtýynsha, qazaqstandyq boksshylardyń qatysýymen ótetin jekpe-jek 24 jeltoqsan kúni Almatyda ótedi dep josparlanǵan. Al Batyr Júkembaev osy keshtiń basty aıqasynda WBC Asia tıtýlyn sarapqa salady. Ázirshe otandasymyzdyń qarsylasy belgisiz. Bul Júkembaevtyń Qazaqstanda ótkizetin tuńǵysh jekpe-jegi bolmaq.
1991 jyly Jambyl oblysynda dúnıege kelgen boksshy 2015 jyldan beri kásipqoı boks sharshy alańynda jekpe-jek ótkizip júr. Búginge deıin ol 19 márte rıngke kóterilip, 18 kezdesýinde qarsylasynan basym tússe, 14 jekpe-jegin merziminen buryn aıaqtaǵan. Bir aıqasynda qarsylasynan tehnıkalyq nokaýtpen jeńilip qalǵan. Júkembaev 19 jekpe-jeginiń 18-in Kanadada ótkizse, bir ret AQSh-ta aıqasqan.
