«Halyqtyń senimin aqtaýymyz kerek, sondyqtan bárimiz jumysqa kirisýimiz qajet», dedi. Prezıdenttiń «bárimiz» degen sóziniń salmaǵy bar, myqty memleket ornatý úshin bir Prezıdent qana emes, árqaısysymyz da óz úlesimizdi qosyp, aldymyzdaǵy jumysymyzdy ádil atqarýymyz kerek. Qazir úlken reformalardyń basy bastalyp jatyr, eger adaldyq pen ádildik bolmasa, eshqandaı reformanyń nátıjesi bolmasy anyq.
Qazaqstan halqy bul kúni úlken jaýapkershilik tanytty. Al Prezıdentti ulyqtaý rásimi jańa saıası dáýirge jol ashty desek te artyq aıtpaımyz. Buǵan deıin memlekettik basqarýǵa, kadr saıasatyna, sheshim qabyldaý júıesine jáne olardy oryndaý jaýapkershiligine degen kózqarasty ózgertý týraly bastamalar kóterilgeni esimizde. Bolashaqta basty bılik ınstıtýttarynyń túgel jańǵyrtylatynyn Memleket basshysy bul joly taǵy da atap ótti.
Men aldaǵy jeti jyldan ne kútemin?
Eń bastysy, el tynyshtyǵy. El irgesi bútin, halqymyz bir jaǵadan bas, bir jeńnen qol shyǵaratyn bolsa, elimiz úlken jetistikterge jetedi. Prezıdentimizdiń tyń ózgeristerge bel sheshe kiriskendigi senim uıalatady. Bul – Otanǵa degen súıispenshiliktiń shynaıy kórinisi.
Endigi maqsat – el ekonomıkasyn damytý, halyqtyń ál-aýqatyn jaqsartyp, memleketti aldyńǵy qatarlylardyń biri etetin tetikterdi júıeli júrgizý. Sıfrlyq tehnologııalardan elimiz alǵa ozǵanyn kóptegen sheteldik ekspertter de aıtyp júr. Sıfrlyq tehnologııalarǵa negizdelgen ekonomıka qurý jaı qajettilik emes, negizgi maqsatymyz ekenin Qasym-Jomart Kemeluly Joldaýynda da atap ótken bolatyn. Jańa Qazaqstan ekonomıkasy halyqtyń ál-aýqatyn arttyrýǵa baǵyttalǵan. Ulttyq tabystyń ósiminen túsetin ıgilikterdi ádil bólý, tıimdi áleýmettik «lıftilerdi» ornyqtyrý jónindegi qoǵamnyń ótkir talaby basty maqsattardyń biri bolyp otyr.
Elimizdiń jańa ekonomıkalyq baǵdary basty jeti qaǵıdatqa negizdelgen. Olar: ıgilikter men mindetterdiń ádil bólinisi, jeke kásipkerliktiń jetekshi róli, ádil básekelestik, kásipkerlerdiń jańa býyny úshin naryq ashý, ónimdilikti kóbeıtý, ekonomıkanyń aýqymdylyǵyn jáne tehnologııalyq sıpatyn arttyrý, adam kapıtalyn damytý, jańa úlgidegi bilim salasyna ınvestısııa tartý, «jasyl» ekonomıkany damytý, qorshaǵan ortany qorǵaý, memleket tarapynan dáıekti sheshimder qabyldaý jáne sol úshin qoǵam aldynda jaýapty bolý.
Bul rette bizdiń básekege qabilettigimizdi kórsetetin artyqshylyǵymyz jáne naqty súıenetin múmkindikterimiz jetkilikti. Prezıdenttiń ózi: «Aýyl sharýashylyǵyn damytpaı, básekege qabiletti ekonomıka qurý múmkin emes» dep atap ótken edi. Rasynda da, aýyl sharýashylyǵy men jeke kásipkerlik – búgingi tańda el ekonomıkasyn damytýdyń basty tetikteriniń biri.
Ulttyń saýlyǵy – keleshek urpaqtyń saýlyǵy. Sondyqtan kóp nárse elimizdegi medısınalyq ınfraqurylymdy damytýǵa baılanysty ekeni ras. Qazir memleket esebinen kóptegen aýrýhana men emhana, kópsalaly medısınalyq ortalyq qurylysy júrip, endigi paıdalanýǵa berilip te jatyr. 2025 jylǵa qaraı densaýlyq saqtaý salasyna arnalǵan 20 zamanaýı kópsalaly nysan paıdalanýǵa beriletini de aıtylýda. Qazirgi kezde alǵashqy dárigerlik kómekti uıymdastyrý tásilderi túbegeıli qaıta qarastyrylyp jatqanyn bilemiz. Dárigerlik qyzmet qalyń jurtshylyqqa, ásirese alystaǵy aýyl turǵyndaryna qoljetimdi bolýy jolǵa qoıylyp jatqany qýantady.
Elimizdiń damýyna, álemge tanylýyna sport pen mádenıettiń yqpaly úlken ekeni ejelden belgili. Qazir elimizde mádenıet, týrızm, sport jáne til saıasaty oń jolǵa qoıylyp, osy salalardaǵy jobalarǵa erekshe kóńil bólinip otyr. El basshysy Qasym-Jomart Toqaev mádenıet jáne sport qaıratkerleriniń áleýmettik turmys jaǵdaıyn jaqsartý, jergilikti atqarýshy organdarmen jáne bıznes-qurylymdarmen ózara yqpaldastyqty nyǵaıtý boıynsha jumystardy jandandyrý qajettigin únemi aıtyp júr. Qazir elimizde jańa saıası mádenıet qalyptastyrylyp jatyr. Árıne, qoǵamda túrli kózqaras bar, degenmen, ult – birtutas. Ár alýan pikirlerdi qurmetteı otyryp, dıalog júrgizý – qazirgi memlekettik saıasattyń basty ustanymy ekenin kórip otyrmyz. Mundaı tásilmen kez kelgen el sózsiz alǵa jyljıdy. Prezıdent mádenı-tarıhı qundylyqtardy qalyptastyrý, damytý men saqtaýda mańyzdy ról atqaratyn mádenıet jáne óner qyzmetkerleriniń de áleýmettik jaǵdaılaryn nazardan tys qaldyrmaýǵa tapsyrma bergen bolatyn.
Eń bastysy, halqymyz óz Prezıdentine tańdaý jasady. Endigi jerde, Memleket basshysy aıtqandaı, tek bel sheshe jumysqa kirisý qaldy. Aldaǵy jeti jylda el basshysy Qasym-Jomart Toqaevpen birge elimiz úlken jetistikterge jetetindigine kámil senemin.
Sát TOQPAQBAEV,
zapastaǵy general-polkovnık
