– Qaraǵandy oblysynyń tarıhynda bizdiń sportshylarymyzdyń altyn medaldi kóptep jeńip alǵany birinshi ret. Iá, jarysqa daıyndyq kúshti boldy. Balalardyń jeńiske degen qulshynysy zor edi. Álemniń barlyq elinen balýandar qatysyp, 11 kilemniń ústinde ótken jekpe-jekte eń kishkentaı sportshylarymyz da kem degende 2-3 jekpe-jekke shyqty, – deıdi Qaraǵandy oblysy djıý-djıtsý federasııasynyń prezıdenti Aıan Shermaǵambetov.
Halyqaralyq dodada baby men baǵyn synaǵan sportshy 5 jasta eken. Bestegi sportshy – Nıkolaı Shkýropat kúmis ıelenip kelipti. Onyń ápkesi Varvara altyn, aǵasy Ioann men ápkesi Matrona kúmis medal alǵan. Balalardyń ákeleri Vıachaslav Shkýropat kúmis júldeger atandy.
– Otbasymyzben djıý-djıtsýǵa baramyz. Bul – qyzyqty jáne jaraqat alý qaýpi az sport. Anamyz djıý-djıtsýdan Azııa chempıony, – deıdi Varvara. Sonymen qatar aımaqta brazılııalyq djıý-djıtsýdan alǵashqy qara belbeý ıegerleri de anyqtaldy.
Álem chempıonatynan soń professor Vıktor Moraes qaraǵandylyq sportshylar men jattyqtyrýshylar Marat Qutjanov pen Oljas Nurtaqanovty attestattaýdan ótkizip, qara belbeý tabys etipti.
– Brazılııalyq professor Vıktor Moraespen úsh aı jattyǵý ótkizdi. Oljas ekeýmizdiń nátıjelerimizdi baǵalaı otyryp, qara belbeý tabys etti. Endi qara belbeý maǵan oqýshylardy sertıfıkattaýǵa múmkindik beredi. Buryn mamandardy shaqyrtatynbyz, – deıdi Mario Bros klýbynyń negizin qalaýshy Marat Qutjanov.
Derekterge súıensek, sońǵy eki jylda Qaraǵandy oblysynda djıý-djıtsý boıynsha 11 seksııa ashylǵan. Bul seksııalarda myńnan astam adam bar.
– Sportshylardyń damýy úshin kóptegen jarys ótkiziledi. Jeltoqsan aıyna birneshe baıqaý josparlanǵan. Mysaly, 10-11 jeltoqsanda eresek sportshylar Qazaqstan chempıonaty men Qazaqstan kýbogine, kelesi jylǵa irikteýge qatysady. Balalar 1-2 jeltoqsanda Almatyda ótip jatqan týrnırge qatyssa, al 3-4 jeltoqsanda Astanaǵa týrnırge barady. 2023 jyldyń qańtar aıynyń sońynda Qaraǵandyda jyl saıynǵy Karaganda BJJ Open týrnıri uıymdastyrylady, – dedi Aıan Shermaǵambetov.
Qaraǵandy oblysy
