Júz elý myńǵa tarta turǵyny bar Ekibastuz qalasy jer betine GRES-2 stansasyndaǵy eń bıik qubyrymen, «Bogatyrdeı» alyp kómir kenishimen áıgili, ot júrekti adamdarymen baǵaly. Osyndaı dańqty shahardyń eńbek adamdary men olardyń jarqyn da jasampaz isterin qalamyna arqaý etip kele jatqan aqyndardyń biri – Janargúl Qadyrova. Ol Ekibastuz qalasyndaǵy jalǵyz qazaqtildi basylym – «Otarqa» gazetiniń redaktory, «Jetinshi qabat», «Ákeniń kózi», «Baıanda tosam», «Er ákeme eskertkish» kitaptarynyń avtory. Birneshe jyr jınaqtary túrik, ázerbaıjan, qyrǵyz tilderine aýdarylyp, osy elderde jaryq kórgen qazaq aqyndary antologııalaryna kirdi. Sonymen birge avtordyń ózi de ázerbaıjan aqyndary jyrlaryn tárjimalaý jobasyna qatysyp, fransýz klassıgi Sharl Bodlerdiń óleńderin qazaqsha sóıletti.
Baıanaýylda dúnıege kelip, Kerekýde bilim alǵan Janargúl Ábdikárimqyzy árdaıym Ekibastuzdyń aıbynyn asqaqtatyp keledi. Otty jyrlarynyń týýyna sebepshi bolyp, shabytyna qanat bitirgen bul qalany Janargúl aqyn álemge jylý men jaryq syılaǵan «Sham shaharǵa» teńeıdi.
«Tastuǵyrda – qazaqtyń qara shaly,
Mynaý – sonyń qaldyrǵan
qara oshaǵy.
Álemge de úlgergen aty shyǵyp,
Sham-shahardyń artady baǵasy áli», – deıdi alda qalany jarqyn bolashaq kútip turǵanyna meńzep.
Bir sát aqyn ózi jan-tánimen súıetin qalany Jumat Shanın atyndaǵy týǵan aýylyna da uqsatady.
«Kúniń kókte jaınaǵan laǵyl qusap,
Ystyq maǵan sendegi dabyrly sát.
Ekibastuz, turasyń janarymda
Sol baıaǵy men týǵan aýyl
qusap...»
– dep qııal qanatyna minip, aýylyna da saıahat shegedi.
Jalpy, Janargúldi aqyn retinde tanytqan – mahabbat, súıispenshilik taqyrybyndaǵy lırıkalyq jyrlary. Onyń «Jetinshi qabat», «Sáıgúlikterdiń patshasy», «Baıanda tosam» óleńderi kópshilikke jaqsy málim.
Qazaqstannyń eńbek sińirgen qaıratkeri, tanymal ánshi Merýert Túsipbaeva oryndap júrgen kóptegen ánniń sózin Janargúl aqyn jazǵan. Osy keshte óner ıesi «Saǵan qaraı», «Jaratqan ıem», «Jan aǵa», «Suraýy bar», «El tórine tartý» ánderin shyrqady. Sonymen birge Janargúl Qadyrovanyń sózine jazylǵan «Baýyrym» ánin jergilikti ánshi Gúlmıra Aldanova, «Jaýyp tur jaýyn» ánin Altyngúl Baqythan, «Sáıgúlikterdiń patshasy» ánin «Qyran» toby áýeletti.
Keshte eli aqyn qyzdy erekshe qasterlep, qoshemet kórsetti. Pavlodar oblysy mádenıet, tilderdi damytý jáne arhıv isi basqarma basshysynyń mindetin atqarýshy Medet Taýasqan oblys ákiminiń quttyqtaýyn jetkizip, óńirine «Oblys aldynda sińirgen eńbegi úshin» belgisin taqty. Al Qazaqstan Jazýshylar odaǵy óńirlik fılıalynyń tóraǵasy Jarqynbek Amantaıuly Ázerbaıjannyń Qazaqstandaǵy Tótenshe jáne ókiletti elshisi atynan Qurmet gramotasyn tabystady.
Pavlodar oblysy,
Ekibastuz qalasy
