Ábsattar Derbisáli atyndaǵy dárishana

«Ál-Farabı» atyndaǵy kitap­hanada «Akademık Ábsattar Derbisáli atyndaǵy sırek kitap­tar men qoljazbalar qorynyń» ashylýymen bastalǵan alqaly jıyn barysynda Shyǵystaný fakýltetinde akademık Ábsat­tar Derbisáli atyndaǵy dárishana ashyl­dy. Konferensııany ál-Fara­bı atyndaǵy QazUÝ rektory Jan­seıit Túımebaev ashyp, akademık Ábsattar Der­bisáliniń ómir jolyna, el ǵyly­mynyń damýy­na qosqan súbeli eńbegi, oqý-aǵar­­tý­shylyq qyzmetine toqtaldy. 

Alqaly jıyn barysynda Parla­ment Senatynyń Tór­aǵasy Máýlen Áshimbaevtyń, Premer-Mınıstrdiń orynbasary – Syrtqy ister mınıstri Muhtar Tileýberdiniń, Prezıdent Ákimshiligi Basshysynyń orynbasary Aıda Balaevanyń,  Aqparat jáne qoǵamdyq damý mınıstri Darhan Qydyráliniń, Ǵylym jáne joǵary bilim mınıstri Saıasat Nurbektiń quttyqtaý hattary oqyldy.

Parlament Senatynyń Tór­aǵa­sy Máýlen Áshimbaev­tyń qut­­tyq­taý hatynda: «Ábsat­tar Der­bisáli Qazaq­stan musylman­dary dinı basqarma­synyń tór­aǵasy, Bas múftı retinde elimiz­degi beıbitshilik pen kelisimniń nyǵaıýyna zor eńbek sińirdi. Ǵalymnyń eńbekteri ıslam álemi úshin quny joǵary. El úshin aıanbaı eńbek etken tulǵanyń  parasat pen taǵylymdy ómirin keńi­nen dáripteý barshamyzdyń aza­mattyq paryzymyz. Osy turǵyda búgingi sharanyń mańyzy zor» delingen.

Sanaly ǵumyryn ǵylym men bilimge arnaǵan ǵalymnyń dinı aǵartý salasyndaǵy eńbegi, Qazaq­stan musylmandary dinı bas­qarmasyn basqarǵan jyldar­daǵy oqý-aǵartý salasyn­daǵy ǵyly­mı eńbekteri, ǵıbratty shyǵar­malary qoǵamdy izgilikke úndedi. Qazaqstan musylmandary dinı basqarmasynyń tóraǵa­sy, Bas múftı Naýryzbaı qajy Taǵanuly osy jıynda baıandama jasap, akademık Ábsattar qajy Derbisáli basshylyq etken jyldarda QMDB jańa kezeńge aıaq basqanyn atap ótti.

«Ábsattar qajy Derbisáli sana­ly ǵumyryn ǵylym men bilim­ge arnaǵan ǵalym. О́zine júk­telgen dinbasy qyzmetin aby­­roımen atqardy. Din sala­syn­da qujattandyrý, is qaǵaz­daryn júrgizý máselesin retke keltirdi. Dinı mamandaryn daıarlaý isine kóńil bólip, 2001 jyly «Nur-Múbárak» Mysyr-Islam mádenıeti ýnıversıtetin ashty. Qazirgi tańda atalǵan bilim ordasy dinı joǵary bilimdi, bilikti mamandar daıarlaıtyn oqý ornyna aınaldy. Sondaı-aq elimizdiń toǵyz aımaǵynan toǵyz medrese, bir qarılar daıyndaıtyn ortalyq ashyldy. Akademık «Meshit pen medreseler» kitabynda elimizdegi tarıhı, zamanaýı meshitter, kóne jáne keıinnen ashylǵan medreseler jóninde keńinen aqparat berdi. Aldaǵy ýaqytta QMDB tóralqa májilisinde haziretimizdiń atyn elimizdegi bir meshitke berý jos­parlanýda», dedi Bas múftı.

Memleket jáne qoǵam qaırat­kerleri, Túrkııa, Reseı, Mysyr, Iordanııa, О́zbekstan, Tájikstan, Iran memleketteriniń elshileri men konsýldary, din salasynyń qyzmet­kerleri, QazUÝ-diń oqytý­shy-professorlar quramy jáne bilim alýshy jastar qatysqan jıyn barysynda «Ábý Nasyr ál-Farabı shetel jáne Qazaqstan ǵalymdarynyń zertteýlerinde» kitaby men «Akademık Ábsattar Derbisáli ǵalymnyń ǵıbratty ómir joly» atty estelik  kitaptarynyń  tanystyrylymy ótip, seksııalyq jumystarmen jalǵasty.

ALMATY