Kesh basynda saltanatty jıynǵa kelgender ýnıversıtet tarıhyn tarata kórsetken beınerolıkten oqý ornynyń burynǵy hám búgingi tynysymen tanysty.
– Oqý orny bilim, ǵylym ordasy ǵana emes, Syr óńirindegi rýhanı-mádenı ortalyqqa aınalǵanyn kórip otyrmyz. Tarıhy tereń qarashańyraq bıylǵy oqý jylynda ýnıversıtetter arasynda júrgizilgen eń joǵary reıtıng «Asian University Rankings – 2023» qorytyndysy boıynsha álemniń 23 elinen qatysqan 760 ýnıversıtet ishinen úzdikter qataryna endi. Aıryqsha aıta keter taǵy bir jańalyq, Koreıa men Qazaqstan arasyndaǵy joǵary bilim salasyndaǵy ekijaqty yntymaqtastyqty ilgeriletý aıasynda Qorqyt ata ýnıversıteti men Seýl ulttyq ǵylym jáne tehnologııalar ýnıversıtetiniń ınformatıka jáne ınjınırıng departamenti birlesip, «Jasandy ıntellekt jáne ınformatıkanyń jańa mektebi jáne bıznes-ınkýbasııalyq ortalyǵyn qurý» jobasyn ázirledi. Bul joba elimizdiń ekonomıkalyq jáne sıfrlyq damýyna úlken úles qosady. Sonymen qatar ýnıversıtet akademııalyq artyqshylyqtar ortalyqtary ashylatyn 20 óńirlik joǵary oqý oryndary qataryna kirdi, – dedi Ǵylym jáne joǵary bilim mınıstri.
Oblys ákiminiń orynbasary Nurymbet Saqtaǵanov batyl bastamalar men tyń izdenister arqyly ýnıversıtet otandyq jetekshi oqý oryndary arasynda laıyqty oryn alyp otyrǵanyn atap ótti.
Jyl saıyn jergilikti bıýdjet esebinen áleýmettik jaǵynan az qamtylǵan otbasylar balalaryn oqytý úshin bilim granttary bólinip otyr. Ýnıversıtettegi jas ǵalymdardyń arheologııalyq, agrarlyq saladaǵy jobalary únemi qoldaý taýyp keledi. Zaman aǵymyna ilese bilgen oqý ornynda jańa mamandyqtardy oqytyp, kadrlar daıarlaýdyń múmkindigi mol. Alda bıýdjet esebinen ekonomıka salalary boıynsha mamandyqtar sanyn kóbeıtý josparlanyp otyr.
Qorqyt ata atyndaǵy Qyzylorda ýnıversıtetiniń basqarma tóraǵasy – rektory Beıbitkúl Kárimova irgesi qalanǵaly beri biregeı bilim ordasynda 80 myńǵa jýyq maman daıarlanǵanyn jetkizdi. О́ńir ekonomıkasy salalaryndaǵy mamandardyń 80 paıyzǵa jýyǵy osy qarashańyraqtan túlep ushqandar. Saltanatty jıyn «Tanym tumary» atty teatrlandyrylǵan qoıylymǵa ulasyp, ustazdar men ǵalymdarǵa qurmet kórsetildi.
QYZYLORDA
