Osy joly dárigerler úsh jasar balanyń asqazanynan shynashaqtaı «batareıany» operasııasyz alyp tastady. «Shynashaqtaı» batareıa dep mamandar aıtyp otyr. Shyn máninde, bul bala asqazany úshin barmaqtaı úlken zat. Qolynda úsh jasar balasy bar áke-sheshe Balalar shuǵyl medısınalyq kómek kórsetý ortalyǵyna jetkizildi. Sábıdiń anasynyń aıtýynsha, balasy qolyndaǵy batareıany aýzyna salyp, jutyp qoıǵan.
Árıne, FGDS zertteýi – asqazannyń tómengi jaǵynda shynashaqtaı bógde zattyń bar ekenin kórsetti. Balalar jedel járdem bóliminiń dárigerleri balanyń denesinen qaýipti zatty shyǵarýdy dereý qolǵa alýǵa májbúr boldy. О́ıtkeni balada batareıany jutqannan keıin birneshe saǵat ishinde qabyný prosesi bastalady. Bul asqazannyń nemese óńeshtiń shyryshty qabyǵynyń kúıip ketýine, tipti osy aǵzanyń perforasııasyna ákelýi ábden múmkin.
«Bóten zatty shyǵarý kezinde qaıta-qaıta óńeshtiń joǵarǵy úshten bir bóliginen, dál joǵarǵy fızıologııalyq tarylý aımaǵynda syrǵyp kete berdi. Sodan biz batareıany joǵarǵy bólikke jetkizip, onyń artyna Foleı kateterin qoıýdy sheshtik. Bóten dene dormııa kárzeńkesiniń (endoskopııalyq prosedýralar kezinde qýystaǵy tastar men túrli bógde denelerdi alyp tastaýǵa arnalǵan qural) kómegimen alyndy. Sodan keıin Foleı kateteri úrlenip, endoskoptyq tútik jáne bógde deneni ustap alǵan dormııa sebetimen birge asqazan men óńeshten sátti shyǵaryldy», dedi Balalar shuǵyl medısınalyq kómek kórsetý ortalyǵynyń hırýrg-endoskopıst dárigeri Murat Dúısebaev.
Bul joly jedel medısınalyq kómek pen dárigerlerdiń tapqyrlyǵynyń arqasynda hırýrgııalyq operasııa jasaýdyń qajeti bolmady.
Dárigerler ata-analardan kishkentaı balalarǵa muqııat bolýdy, náreste oınaıtyn zattarǵa nazar aýdarýdy suraıdy. Balalardyń qolyna túskenniń báriniń dámin tatyp, jemeıtin zattardy únemi aýzyna sala beretin ádetin jurtqa túsindirýdiń ózi artyq. Esi kirmegen bala muny qyzyǵýshylyqtan ǵana emes, ózine basqalardyń nazar aýdarýy úshin de jasaıdy, deıdi mamandar.
ALMATY
