Saryózektegi shabýyldaýshylar quramasynyń batalon serjanty Erbol 2019-2020 jyldary BUU Lıvandaǵy ýaqytsha kúshteriniń shyǵys sektorynda bitimgerlik qyzmet atqarǵan eken.
Jalpy, qazaq bitimgerleri 2018 jylǵy qazan aıynan beri Izraıl men Ońtústik Lıvan shekarasynda ornalasqan UNIFIL mıssııasyna qatysyp keledi. Atap aıtqanda, onda bizdiń jigitter úndi bitimgerlerimen birlesip, jergilikti jerdi jaıaý jáne mobıldi patrýldeýdi, tosqaýyl beketteriniń jumysyn uıymdastyrýdy, bazalardy kúzetý men túrli operasııany júrgizýdi júzege asyrady.
Beıbitshilik pen qaýipsizdikti qoldaýshy qazaqstandyq «kógildir kaskalardyń» Lıvandaǵy úshinshi quramy sapynda qyzmet etken Erbol baýyrymyzdyń jergilikti áskerılerge jasaǵan erekshe tartýy jaıly mıssııaǵa qatysýshylar rızashylyqpen aıtady.
– Kópultty kúshter qolbasshylyǵynan bitimgerler turatyn kazarma qabyrǵasyna mýral salý týraly usynys tústi. Bul jaýapty tapsyrmany qýana qabyldadym, – deıdi II synypty serjant Erbol Rabatov. – Mıssııadaǵy negizgi mindetterimdi atqarýdan qolym bosaǵan kezde jumysqa bar ynta-jigermen kiristim.
Eki aptada daıyn bolǵan bitimgerlerdiń birlesken qımyly beınelengen mýral kóp-ultty kúshterdiń kóńilinen shyqty. Sonadaıdan erekshe kóz tartatyn týyndy, tipti BUU basshylyǵynyń da qyzyǵýshylyǵyn týǵyzǵan. Erboldyń qurmetine Lıvanda shaǵyn sýret kórmesi uıymdastyrylyp, mıssııa qolbasshylyǵy jerlesimizge Alǵyshat tapsyryp, baǵaly syılyqpen marapattaǵan.
Úndistandyq bólimshe komandıri polkovnık Naraıan Sınh Amıt «sýrettiń kóshirmesin salyp berińiz» dep qolqalapty. Bul ótinishti de qup alǵan jerlesimizge taǵy eki apta ýaqytyn shyǵarmashylyqqa arnaýǵa týra kelgen. Kenepke maıly boıaýmen salynǵan kartınany polkovnık eline jetken soń Úndistan Qarýly kúshteriniń áskerı murajaıyna ótkizipti. Qazaq sarbazy salǵan sýrettiń mýzeıden tabylý tarıhy osyndaı.
Erbol bala kúninen sýret salýǵa beıim bolyp ósken. Tipti úıdiń qabyrǵalaryn qııalyndaǵy keıipkerlerimen toltyryp tastaıtyn kúnderi kóp bolatyn. Balasynyń ónerge qushtarlyqtan týǵan bul qylyǵyna anasy da qabaq shytqan emes. Mektepte oqyp júrgeninde sýret páninen sabaq beretin muǵalimi Amanjol Beksultanov ony kórkemsýret úıirmesine qabyldap, talantyn ashýǵa sep boldy. Jetinshi synypta jas sýretshiler arasynda ótken baıqaýda birinshi oryn alyp, jaqyndaryn qýantqany bar. Sol joly jeńimpaz balaǵa ásem Almatyny kórý baqyty buıyrdy.
Búginde áskerı ótili 20 jyldan asatyn Erbol Rabatov qoly qalt etkende sheberhanasynan tabylady. Týǵan jeriniń tabıǵatyn qalaı súıse, qylqalamyn da solaı qasterleı bilgen sýretshiniń taqyryby ár alýan. Kartınalary ulttyq boıaýǵa qanyq.
Erbol – sport sheberine kandıdat. Kezinde Jarkenttegi Dáýlet Turlyhanov atyndaǵy grek-rım kúresi klýbynda jattyǵyp, birqatar dodada top jarǵany bar.
Sport pen ónerdi janyna serik etken segiz qyrly, bir syrly jigittiń únemi shyǵarmashylyq izdenis ústinde júretini baıqalady. Olaı bolsa, maqsaty aıqyn Erboldyń bolashaǵy da jarqyn bolaryna biz de senimdimiz.
Muharbek MAHAMBET,
áskerı jýrnalıst
