Infografıkany jasaǵan Amangeldi Qııas, «EQ»
Kelesi jyldan bastap jastar 2,5 paıyzdyq mólsherlememen nesıe ala alady. Qazir Úkimet Memleket basshysynyń tapsyrmasyna sáıkes jastardyń kásipkerlik yntasyn kóterý jáne qoldaý maqsatynda shaǵyn nesıe berý ádisterin qarastyryp jatyr.
– 2023 jyldyń 1 qańtarynan bastap jastarǵa shaǵyn nesıeler beriledi. Onyń paıyzdyq mólsheri 2,5%-dy quraıdy. Qazirgi kezde erejeler jobasy jasalyp, «Ashyq NQA» portalynda jarııalandy. Basty sharty – kepildik bolýǵa tıis. Ol mindetti túrde úı bolýy tıis emes, baǵalanýy teń basqa da múlik bolýy múmkin. Nesıe mólsheri 5 mln teńgege deıin. Berilý merzimi 5 jylǵa deıin. Eger qaryz aýyl sharýashylyǵyn júrgizý maqsatynda nemese iri qara mal asyraý úshin alynsa, onda 7 jylǵa deıin beriledi. Nesıe alǵan jastarǵa 1,5 jylǵa «kanıkýl kezeńi» usynylady, ıaǵnı, atalǵan ýaqytta olar aı saıynǵy jarna tóleýden bosatylady, – dedi Eńbek jáne halyqty áleýmettik qorǵaý mınıstrligi Halyqty jumyspen qamtý departamentiniń dırektory Asqar Nııazov Ortalyq kommýnıkasııalar qyzmetinde ótken brıfıngte.
Mıkrokredıt jastardyń kásipkerlik bastamalaryn damytýǵa arnalǵan. Úkimet keler jyly oǵan 5,8 myń jas qol jetkizedi dep josparlap otyr.
– Memleket jastardy jumyspen qamtý máselesine erekshe nazar aýdaryp otyr. Atap aıtsaq, jyl saıyn «Jastar praktıkasy», «Alǵashqy jumys orny», «Jeńildikpen kredıtteý» jáne «Dıplommen – aýylǵa!» baǵdarlamalary sııaqty jobalardy iske asyrý sheńberinde respýblıka boıynsha 100 myńǵa jýyq jas eńbekpen qamtylady. Halyqty eńbekpen qamtýdyń taǵy bir quraly – naryq suranysyna qaraı azamattardy qysqa merzimde oqytý. Atalǵan jobanyń aıasynda azamattar jańa mamandyq meńgerip, oqý aıaqtalǵannan keıin jumysqa ornalasa alady. Jyl basynan beri 35,2 myń adam oqytyldy, – dedi Eńbek jáne halyqty áleýmettik qorǵaý vıse-mınıstri Oljas Ordabaev.
Jalpy, elde sýbsıdııalanatyn jumys oryndarymen qamtylǵan 161 myńǵa jýyq azamattyń 36 paıyzyn jastar quraıdy. Olarǵa jalaqy memleket tarapynan ishinara nemese tolyqtaı tólenedi. Eger jumys berýshiniń belgilengen talaptaryna saı keletin bolsa, jastar kásiporyndarda jumysqa ornalasa alady. Ol úshin Eńbek bırjasy arqyly qajet oryndarǵa ótinish berý kerek.
– Qazir sýbsıdııalanatyn jumys oryndarymen qamtylǵan 161 myńǵa jýyq azamattyń 36%-yn jastar qurap otyr. Mundaı jumys oryndarynyń negizgi maqsaty – jastardyń naqty mashyqtary men daǵdylaryn ıgerip, odan ári turaqty jumysqa ornalastyrý. Qazirgi kúni jastardy jumyspen qamtý sharalarynyń birneshe baǵyty boıynsha júzege asyrylyp keledi. Olardyń ishinde «Jastar praktıkasy», «Alǵashqy jumys orny», «Urpaqtar kelisimsharty», qoǵamdyq jumys sııaqty jobalar kózdelgen. Bul jobalar jasy 29-dan aspaǵan JOO túlekteri nemese jumys tájirıbesi joq NEET sanatyndaǵy jastardy jumysqa ornalastyrýǵa baǵyttalǵan, – dedi vıse-mınıstr.
