Sharýalardyń jaqyn mańdaǵy turǵyn úı ıeleri men sharýashylyq qurylystardyń sý ótkizýge kedergi keltiretinine alańdaıtynyn eskergen óńir basshysy tıisti tulǵalarǵa naqty sharalar qabyldaýdy eskertken edi. Odan beri birshama ýaqyt ótti.
Alaıda qarasha aıynda Seńkibaı arnasyna qatysty jurt janaıqaıyn BAQ ókilderine jetkizdi. Jergilikti jurtshylyqtyń aıtýynsha, 14 eldi mekenge sý jetkizip otyrǵan kanaldy árkim óz betinshe bitep tastaǵan eken. Sonyń saldarynan egis alqaptaryna birneshe jyl boıy sý jetpeı keledi. Osy máseleni ońynan sheshýdi talap etken jurtshylyq ýshyqqan máselege jergilikti atqarýshy bılik núkte qoısa degendi alǵa tartady.
«Kanaldyń boıynda otyrǵan halyqty kim oılaıdy? Áldekimderdiń arnany biteýi saldarynan halyq japa shegip otyr. Jergilikti atqarýshy bılik ókilderi bizdiń shymbaıymyzǵa batqan osy máseleni sheship berse durys bolar edi. Halyqqa qaraılasatyn kim bar ózi?», degen Seńkibaı aýylynyń turǵyny Ánýar Serikbaevtyń janaıqaıy eshkimdi beıjaı qaldyrmasa kerek.
Rasynda da ýaqytynda arnasynan asyp aqqan kanal sýynyń Taraz qalasynan shyǵar tusynyń qańsyp qalǵany kimdi de bolsyn oılandyrmaı qoımaıdy. Shilińgir shildede sý izdep sarylǵan halyqty áldekimderdiń arnany qoldan qurǵatyp otyrǵany ashyndyrǵany aqıqat. Olar yqpaldy adamdardyń óz tirligi úshin jurttyń júıkesine shı júgirtkenine ókpeli. Mundaı keleńsizdiktiń ary qaraı jalǵasqanyn qalamaıdy.
О́tkir máselege baılanysty ún qatqan Taraz qalasy ákiminiń orynbasary Nurbol Qaldybaev máseleniń mánisine tereń úńiletinin aıtqan bolatyn.
«Bul derek boıynsha endi ǵana habardar bolyp turǵan jaıym bar. Aldaǵy ýaqytta osy máselege qatysty naqty jumystardy bastaıtyn bolamyz. Qorǵaý aýmaǵyna kirgen jekemenshik kásipkerler, jeke úıler bar, zańsyz menshiktep alý bar, kanaldarǵa káriz júıelerin shyǵaryp qoıǵan derekter kezdesedi. Sol boıynsha jumystar júrgizemiz», deıdi Taraz qalasy ákiminiń orynbasary.
Rasynda da jaz mezgilinde arna sýyna jarymaǵan jurttyń janaıqaıyn birneshe márte estigen bolatynbyz. Máselen, Sarysý aýdanyna qarasty Uıym eldi mekeniniń sharýalary «Saryózek» arnasynan keletin sýǵa jarymaı otyrǵanyn, sý tapshylyǵy saldarynan shyǵynǵa batqanyn aıtyp dabyl qaqqan edi. Atalǵan másele «Egemen Qazaqstan» gazetinde tamyz aıynda «Shyǵynǵa batqan sharýalardyń máselesin kim sheshedi?» degen taqyryppen jarııalanǵan.
Qys mezgiliniń qamyn jazda oılaıtyn jurt jazdyń máselesin qys kezinde qamdaǵandy jón kóretin sekildi. Ony olardyń janaıqaıynan ańǵarý qıyn emes. Olar osylaısha qarly qarasha aıynda Seńkibaı arnasynyń máselesine bas aýyrtqan edi.
Qala ákiminiń orynbasary atalǵan másele boıynsha taldaý jumystaryn júrgizgen de bolar. Áıtse de, jaz mezgilinde mundaı másele qaıtalanbasyna kim kepil? Seńkibaıdaǵy janaıqaı tolyǵymen sheshimin tapty ma, álde problema kúıinde qaldy ma? Ýaqytynda kóre jatarmyz. Jalpy, jurttyń janaıqaıy nazarymyzdan tys qalmaq emes. О́ıtkeni jaz mezgili kelse boldy, sharýalardyń máselesi aldymyzdan jıi shyǵady. Jurttyń tilegin jergilikti bılik der kezinde eskerse deısiń.
Jambyl oblysy
