Jalpy, sońǵy ýaqytta óńirde jelden jáne kúnnen elektr energııasyn óndirý baǵytynda kóptegen jumys júıeli túrde atqarylyp jatqany belgili. Máselen, búginge deıin óńirdegi 18 elektr óndirý stansasynan jyldyq qýaty 437,8 MVt quraıtyn elektr energııasy óndirilýde. Bul kórsetkish boıynsha Jambyl oblysy elimizde kósh basynda turǵanyn aıta ketken jón. Aldaǵy ýaqytta da osy baǵyttaǵy jumystar jandana túspek.
«Jambyl oblysynda jalpy qýaty 1 GVt bolatyn jel elektr stansasy salynady. Bul jumystyń júıeli túrde iske asýyna «Samuryq-Qazyna», «QazMunaıGaz» jáne Fransııanyń «Total Eren» kompanııalary múddeli. Qysqasy, elimizdegi alpaýyt stansanyń bizdiń óńirde boı kóteretini kóńil qýantady. Fransııa eline resmı saparmen barǵan Qazaqstan Prezıdenti Qasym-Jomart Toqaevtyń qatysýymen ótken is-sharada elimizdiń Energetıka mınıstrligi men Fransııanyń Eýropa jáne syrtqy ister mınıstrligi arasynda osy baǵyttaǵy úkimetaralyq kelisimge qol qoıyldy. Endi naqty jumystar qolǵa alynatyn ýaqyt alys emes. Biz tilge tıek etip otyrǵan jel elektr stansasy shamamen 2026-2027 jyldary paıdalanýǵa beriletin bolady. Sońǵy derekterge zer salsaq, atalǵan nysan elimizdegi jalpy energııa óndirisiniń 50 paıyzyn qamtıdy eken. Bul, árıne, úlken jetistik ekeni talas týdyrmaıdy. Sondyqtan da osy baǵyttaǵy jumysty ári qaraı jalǵastyra berýge nıettimiz», dedi óńir basshysy N.Nurjigitov.
Jambyl oblysy
