50 páter qatty búlingen
Zardap shekken páterlerdi jóndeý, retteý jumystary úshin «Ortalyq-Azııa Elektrenergetıkalyq korporasııasy» (OAEK) AQ búginnen bastap arnaıy brıgadalardy jumyldyrmaq.
Tótenshe jaǵdaı kezinde jarylǵan úıishilik qubyrlar men regıstrlerden ystyq sý atqylap, júzden asa páter qatty búlingen edi. «OAEK» AQ basqarma tóraǵasynyń orynbasary Leonıd Iаnýshkonyń aıtýynsha, 12 jeltoqsannan bastap kásiporynnan jalpy sany 70 adam búlingen páterlerdi jóndeýge shyǵady.
– Aıazda qatyp, keıin jylý qosa bastaǵanda jarylǵan batareıalar men páteraralyq qubyrlardan aqqan ystyq sý páterlerdiń tusqaǵazdaryn, edeni men tóbesin, turmystyq tehnıkalaryn, jıhazdaryn búldirgen. Biz eń áýeli jóndeýdi qajet etip turǵan 50 páterge jóndeý júrgizip bermekpiz. Apat kezinde sýyqtan ábden tıtyqtap qalǵan adamdardyń jaıly ómirge oralýyn nazarymyzda ustap otyrmyz. Dúısenbiden bastap bizdiń brıgadalarymyz páterlerge kire bastaıdy. Al tótenshe jaǵdaı ýaqytynda zaqymdanǵan ózge úılerdiń shyǵyndary qazir eseptelip jatyr. Eger de komıssııa turmystyq tehnıka apat saldarynan isten shyqqanyn rastasa, shyǵynnyń óteletinine úmit artýǵa bolady. Barlyǵy esepke alynyp, qorytyndylanǵan soń páter ıelerimen shyǵynnyń ornyn toltyrý boıynsha esep aıyrysamyz, – dep atap ótti L.Iаnýshko.
Tótenshe jaǵdaı kezinde zardap shekken páterlerdiń ıeleri barlyq shyǵynyn «OAEK» AQ esebinen óndirip ala alady. Ol úshin arnaıy uıymdastyrylǵan pýnktterde ótinish qaldyrýy kerek. Aqaýlardy anyqtaıtyn brıgadalar qazir jumys istep, barlyǵyn qaǵazǵa túsirýde.
Jylý úshin tólemeıdi
Pavlodar oblysynyń ákimi Asaıyn Baıhanov zardap shekken úılerdiń turǵyndary qarasha men jeltoqsan aılarynda jylý energııasy tólemderinen bosatylǵanyn habarlady. Jurtshylyq sýyq páterlerin jylytý úshin elektr jylytqyshtardy kúni-túni qosýǵa májbúr bolǵan edi.
«Endigi kezekte elektr energııasynyń májbúrli túrde ósken shyǵyndaryn óteý máselesi týyndap otyr. Memleket basshysynyń tapsyrmasy boıynsha bul másele birinshi vıse-premer Roman Sklıardyń qatysýymen jáne «Ekibastuzteploenergo» JShS ıelerimen birge sheshildi. TJ kezeńinde, ıaǵnı 27 qarashadan 8 jeltoqsanǵa deıin 48 957 abonent úshin paıdalanǵan elektr energııasyna ótemaqyny ataýly esepteý týraly kelisimge qol jetkizdik. Endi biz esepteýlerdi jáne tólemniń biryńǵaı mólsherin anyqtaımyz ári ony tutynýshylardyń jeke shottaryna aýdarý joldaryn qarastyramyz. Barlyq shyǵyndy «Ekibastuz jylý-energo» JShS ıeleri óz moınyna alady», dedi A.Baıhanov.
Ystyq jáne sýyq sýmen qamtý boıynsha sharalar shaharda áli de jalǵasýda. Senbi kúni Máshhúr Júsip kóshesi, 52-úı (20 kireberisten turady) sý júıesi tolyqtaı qalpyna keltirildi. Al Sátbaev kóshesi, 8-úıde keshe káriz júıesin, sýyq jáne ystyq sý qubyrlaryn jańartý jumystary túıindeldi. Alty korpýstan, 20 kireberisten turatyn kópqabatty záýlim baspanada jalpy uzyndyǵy 1 shaqyrym bolatyn sýyq sý júıesi tolyqtaı aýystyrylǵan.
Teńgerimsizdik saqtalyp tur
Al jeke úılerdi jylýmen qamtý boıynsha jóndeý brıgadalarynyń jumysy da óz máresine taıap kele jatyr. Burnaǵy kúni tótenshe jaǵdaı kezinde jylý júıesi qatyp qalǵan 90 úıdiń kóbi retke keltirilgeni, tek 20-dan asa úı qalǵany belgili boldy.
Bul týraly qala basshysy Aıan Beısekın arnaıy brıfıngte málimdedi. Ol qazirgi kúni jóndeý-retke keltirý brıgadalarynda shamamen 400 adam júrgenin, mamandar apatty joıýmen ǵana emes, jylý júıesiniń teńgerimin qalpyna keltirý sharalarymen aınalysyp jatqanyn atap ótti.
– Kóp úıler áli de bolsyn jylýdyń jetkiliksiz ekenine shaǵymdanýda. Munyń barlyǵy jelilerdegi teńgerimsizdik saldarynan oryn alǵanyn túsindirip jatyrmyz. Júıeni retteý úshin Pavlodardan arnaıy mamandardy shaqyrttyq, 5 top osy ispen aınalysýda. Qalanyń ońtústik bóliginde jylý temperatýrasynyń tómen ekeni, qysymnyń álsizdigi anyqtalǵan. Jelilerdiń tozý kórsetkishi joǵary bolýy sebepti júıeni asyqpaı retteý qajet. Jylý-energo ortalyǵy kásiporynnan shyǵatyn sýdyń ysyrap mólsherin qazir 570-580 tonnaǵa deıin tómendetti. Biraq bul kórsetkish áli de kóp, ol kemi 440 tonnaǵa túsýi kerek. Bul úshin biz jańadan oryn alýy múmkin zaqymdanýlardy izdep, turǵyndardan jelidegi sýdy aǵyzbaýdy surap otyrmyz. Jylý magıstraldarynan keletin sýdyń temperatýrasy men qysymy normaǵa saı, barlyq problema oramishilik jáne úıishilik júıelerden týyndap tur, – deıdi ákim.
Aıan Ýahıtulynyń sózine súıensek, tótenshe jaǵdaı rejimi ýaqytynda qalanyń TJ qorynan shamamen 18 mln teńgedeı qarajat bólingen. Ol jóndeý brıgadalaryndaǵy jumyskerlerdiń tamaǵy men jatyn ornyn qarjylandyrýǵa jumsalypty. Al basqadaı shyǵyndardy «OAEK» pen qala quraýshy úlken kásiporyndar óz moınyna alǵan.
Ákim aldaǵy bir aptanyń ishinde jylý jáne sýmen qamtý júıesindegi barlyq zaqymdaný joıylyp, qala tolyqtaı qalypty ómirge oralady dedi. Odan soń jylý ortalyǵynyń qyzmetkerleri qysqy ýaqytta jelilerde apatty boldyrmaý sharalaryna kirisedi. Jylý generasııasyn arttyrýǵa, yqtımal apat kezinde arnaıy qordyń bolýyna zor kóńil bólinip otyr. Bul boıynsha kásiporyn basshylyǵy men ákimdik arasynda turaqty baılanys ornaǵan. Jýyq ýaqytta jelilerge tehnıkalyq aýdıt júrgizilip, qatty tozǵan aýmaqtardyń kórsetkishi zerdelenip, smetalar túziledi.
Pavlodar oblysy,
Ekibastuz qalasy
