Sýretti túsirgen Erlan OMAR, «EQ»
Bıyl 15 shilde men 15 qazan aralyǵynda uıymdastyrylǵan baıqaýǵa barlyǵy 405 ótinim kelip túsken. Jobanyń negizgi maqsaty – balalarǵa arnalǵan otandyq shyǵarmalardy dáripteý, balalar ánderi men óleńderiniń repertýaryn tolyqtyrý. Sondaı-aq elimizdegi balalar kompozıtorlary men aqyndarynyń shyǵarmalaryn nasıhattaý. Olardy balabaqshalar men mektepterge, balalarǵa arnalǵan mýzyka mekemelerde, mektepke deıingi jáne mektep uıymdaryna, shalǵaıdaǵy aýyldyq kitaphanalarǵa qoljetimdi etý.
Tartysty básekede Qurmanǵazy atyndaǵy qazaq ulttyq konservatorııasy hor dırıjerleý bóliminiń túlegi, «Tandaý» kompanııasynyń mýzykalyq prodıýseri, kompozıtor Elmıra Dehganı úzdik tanylyp Gran-prıdi jeńip aldy.
«Baıqaý uıymdastyrýshylaryna alǵysymdy bildiremin. Balalar ánderi, jalpy, shyǵarmashylyǵy endi tanyla bastaǵan aqyn-kompozıtorlar arqyly odan ári qanatyn keńge jaıady. Osylaısha, bul baǵyt jańasha serpinmen damıdy dep oılaımyn», deıdi E.Dehganı.
«Balalarǵa arnalǵan án» nomınasııasy boıynsha Álibı Ábdinurov birinshi oryndy ıelendi. Júldeli ekinshi oryn Samat Ryspanbetov pen Bekjan Qaıratulyna buıyrdy. Baýyrjan Esebaev pen Nurıslam Dospaı úshinshi orynnan kórindi.
«Balalar poezııasy» nomınasııasy boıynsha Jadyra Baıbulanova birinshi oryndy qanjyǵasyna baılady. Ekinshi oryndy Serikbol Hasanov pen Dostyq Tileýbergenov ıelendi. Baıanǵalı Álimjanov pen Nazıra Berdaly úshinshi orynǵa taban tiredi.
Baıqaýǵa qatysýshylardyń kásibı biligi men jas erekshelikterine shekteý qoıylmaǵan. Jeńimpazdardy marapattaý gala-konserti Erkeǵalı Rahmadıev atyndaǵy Memlekettik akademııalyq fılarmonııanyń konsert zalynda ótti. Jıynǵa Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııasy tóraǵasynyń orynbasary Saltanat Tursynbekova úzdik tanylǵandardy quttyqtap, is-sharanyń mańyzyna toqtaldy.
«Bul baıqaýdy Memleket basshysy jarııalaǵan Balalar jylynda ótkizýdiń máni erekshe. Otanǵa degen súıispenshilikke, joǵary patrıottyq nıetke oń kózqarasty qalyptastyratyn mádenı ónimderdi qurý kerek. Bul iske óner týyndylary arqyly úles qosqysy keletin otandyq avtorlardy qoldaýdyń da mańyzy zor. Konkýrsqa 400-den asa ótinishtiń túsýi qoǵamda rýhanı-adamgershilik jaǵynan ósýge jáne ózin-ózi júzege asyrýǵa suranystyń artyp kele jatqanyn kórsetedi», dedi S.Tursynbekova.
Aıta keteıik, baıqaýdyń qazylar alqasy quramyna belgili eńbek sińirgen mádenıet jáne óner qaıratkerleri, qoǵam qaıratkerleri, memlekettik uıymdardyń ókilderi kirdi.
