– Qazaqstan Respýblıkasynyń Prezıdenti Qasym-Jomart Toqaev Tatarstan Respýblıkasymen jan-jaqty yntymaqtastyq ornatýǵa erekshe mán berýde. On jeti jyl buryn Kókshetaýda Tatarstanmen birlesken alǵashqy «Kamaz» kásiporny iske qosylǵan bolatyn. Qazirgi kúni ol júk kólikterin, arnaıy tehnıkalardy shyǵarady. Bul yntymaqtastyq keńeıip keledi. Qostanaı qalasynda bilikterdi, redýktorlardy shoıynnan quıý boıynsha birlesken zaýyt ashyldy. Búgin shına shyǵaratyn «Tatneft» kompanııasymen birlesken jobany iske qosamyz. Bul – biz úshin biregeı joba. Shına shyǵaratyn tuńǵysh ónerkásip ekenin atap ótken jón. Bul óndiris kólik ónerkásibiniń suranysymen qatar, jekelegen kólikqumarlardyń suranysyn óteıtin bolady. Kásiporyn zamanaýı barlyq talapqa tolyq jaýap beredi, – dedi Roman Sklıar.
Atalǵan zaýyt ónerkásip órkendeýi úshin qandaı mańyzdy bolsa, monoqalalardy damytýda da sondaı mánge ıe. О́ıtkeni óndiristiń tolyq jelisi iske qosylǵanda Saran qalasynyń myńnan asa adamy jumyspen qamtylady. 171 mlrd teńge ınvestısııa quıylǵan zaýyt Sarannyń ındýstrııalyq aımaǵynda ornalasqan.
Tatarstan prezıdenti Rýstam Mınnıhanov zaýyttyń mejesi jylyna 3 500 mln dana dońǵalaqpen shektelip qalmaıtynyn jetkizdi. Onyń aıtýynsha, áli de zor áleýet bar.
– Usynylatyn jumystardyń eńbekaqysy joǵary jáne mamandar kásibı turǵydan bilikti. Qazaqstannyń naryqtaǵy ishki suranysyn qamtyp, Ortalyq Azııa jáne alys shetelge eksportqa shyǵarýǵa múmkindigi bar. Qazaqstan bizdiń sheteldik seriktesimiz retinde qala beredi. Yntymaqtastyq aıasynyń keńdigi qýantady. Bizdiń áli de aýqymdy jobalarymyz bar, – dedi Rýstam Mınnıhanov.
Qysqa merzimde boı kótergen zaýyt mamandaryn Nıjnekamsk qalasyndaǵy kásiporyndarda arnaıy oqytyp aldy. Bilikti mamandar qatary tolyǵa túspek.
«Tatneft» JAQ bas dırektory Naıl Maganov ádette mundaı zaýyttardyń 50-60 aı boıy salynatynyn aıtady. Al Qaraǵandy zaýyty 16 aıda turǵyzyldy.
– Bul birinshi kezeń ǵana. Josparda jelilik óndirister bar. Iri kólemdi shınalar shyǵarý mindeti tur. Munyń bári Qazaqstannyń ınvestısııalyq klımaty men Qazaqstan basshylyǵynyń qoldaýynyń arqasynda iske asty. Biz tıimdi yntymaqtastyq ornatqan Qaraǵandy oblysy, Saran qalasy ákimdikterine rızashylyq bildiremiz, – dedi Naıl Maganov.
Investor ónimniń álemdik brendtermen terezesi teń túsip, sapa jaǵynan súrinbeıtinine kepildik berip otyr.
Zaýyt dırektory Aleksandr Smyshlıaev alǵashqy shına alý arqyly tehnologııalyq úrdis baqylanyp, ónimniń synaqtan ótkenin málimdedi. Iаǵnı qurylǵylardyń jolǵa qoıylyp, tehnologııalardyń daıyndyǵyna, qural-jabdyqtardyń tolyq iske qosylýyna birshama ýaqyt kerek.
– Serııaly ónim alýǵa barlyq úrdis iske qosylǵanda qol jetkizýge bolady. Al bul – 2023 jyldyń úshinshi toqsany. Sol kezeńde zaýyt 3 500 mln shına shyǵarady, – deıdi dırektor.
Zaýyt basshysynyń aıtýynsha, ár dońǵalaq úsh kezeńdi tekseristen ótedi. Birde-bir dońǵalaq sapa ınspeksııasynan ótpeıinshe tutynýshyǵa jiberilmeıdi.
Búgingi tańda kelisimsharttar jasalǵan. О́nimniń qanshasy ishki naryqqa, qanshasy eksportqa shyǵatyny da esepteýli. Zaýytqa Eýropa, Azııa elderiniń ozyq qural-jabdyqtary jetkizilgen. 9 sheteldik jetkizýshi bar. Qurylǵylardy ornatý kezeń-kezeńimen júzege asyp otyr.
Qaraǵandy oblysy,
Saran qalasy
