Keshti Qazaqstan Respýblıkasy Prezıdentiniń keńesshisi Málik Otarbaev Memleket basshysy Qasym-Jomart Toqaevtyń quttyqtaý sózimen ashty. «Kórkem ádebıetti qadirleıtin halqymyzdyń birneshe býyn ókili Ázilhan Nurshaıyqovtyń shyǵarmalarymen sýsyndap ósti. Onyń ádebı týyndylary jas urpaqty qashanda otansúıgishtikke, mahabbat pen adaldyqqa tárbıeledi. Ásirese qalyń oqyrmannyń qolynan túspegen, áli de túspeı kele jatqan «Mahabbat, qyzyq mol jyldar» jáne «Aqıqat pen ańyz» romandarynyń orny bólek. Qansha jyl ótse de qalamgerdiń týyndylary ózektiligin joǵaltpaıdy, óıtkeni onyń shyǵarmalary mádenı muramyzdyń ajyramas bóligine aınaldy. Mereıtoı qutty bolsyn!» degen el Prezıdenti joldaǵan quttyqtaý hatynda.
Budan ári qaraı jazýshy, fılologııa ǵylymdarynyń doktory Nurdáýlet Aqysh bastaǵan jazýshynyń izbasarlary sóz alyp, qalamgerdiń áli de tolyq oqylmaı jatqan mol murasyn nasıhattaý jáne Almaty qalasynda halyqtyń súıikti jazýshysynyń eskertkishin ashý syndy usynystar ortaǵa saldy. Jazýshy N.Aqysh Nurshaıyqov prozasyndaǵy sheberlik tylsymyn saraptaı otyryp, «Mahabbat, qyzyq mol jyldar», «Aqıqat pen ańyz» romandarynyń oqyrmandarǵa nelikten qadirli bolatyndyǵynyń jumbaǵyn qysqasha ádiptep ótti. Eki shyǵarma da halyqtyq sıpat-úlgi, dástúr bolmysy keń qubylyspen astarlasyp, ult, urpaq bolashaǵynyń temirqazyǵyndaı jarqyraı túsýimen qundy edi.
Áz-aǵańnyń ómirlik ini-dosy bolǵan, 34 jyl ekeýara hat jazysyp, nátıjesinde, epıstolıarlyq janr úlgisindegi «Mahabbat jyrshysy» kitabynyń avtory atanǵan qalamger, Qazaqstannyń eńbek sińirgen qaıratkeri Qaısar Álim óz sózinde bıylǵy jazdaǵy Jarma aýdanynda urpaqtary uıymdastyrǵan tájirıbelik konferensııanyń tanymdyq jaǵynan syr shertti. Áz-aǵań jerlesteri týǵan aýyly Birlikte eskertkish soqqaly jatyr, aýdanda kóshe, mektepke esimi berilgen. Qalbataýdaǵy «Mahabbat, qyzyq mol jyldar» alleıasynda jas jubaılar ardagerlerdiń batasyn alady. Sondaı-aq ol Almatyda Á.Nurshaıyqov atyndaǵy murajaı ashylýyn qala ákimdigine qulaǵdar etti.
Ádebı-sazdy keshtiń ózindik qurylymy da kópshiliktiń kóńilinen shyqqandaı. Ekrannan Á.Nurshaıyqovtyń ádebıet, shyǵarmashylyq, týǵan jer, adamgershilik, mahabbat týraly tolǵanystary óz aýzymen aıtylyp, osy taqyryptarǵa oraılastyrylyp ánder shyrqaldy. Nurǵalı Núsipjanov, Ramazan Stamǵazıev, Aıgúl Qosanova, Gúlnur Orazymbetova, «Qońyr» toby, Mádına Sádýaqasova, «Aǵaıyndylar» toby, Mıras pen Quralaı, «Saltanat» memlekettik bı ansambli óner kórsetti. Eske alý keshinde Ǵ.Músirepov atyndaǵy Balalar men jasóspirimder teatrynyń akterleri «Mahabbat, qyzyq mol jyldar» spektaklinen úzindi qoıyp, kórermenderdiń bal-balaýsa kezin eske alǵyzyp, erekshe áserge bóledi.
