Kórsetilim Qazaqstan men Úndistan arasyndaǵy dıplomatııalyq qatynastardyń 30 jyldyǵyn merekeleýge arnalǵan saltanatty is-sharalar aıasynda uıymdastyrylǵan.
Is-shara Qazaqstannyń Úndistandaǵy elshiligi men «Marwah Studios Complex» kompanııasymen birlesip, Sháken Aımanov atyndaǵy «Qazaqfılm» AQ qoldaýymen ótken.
Qazaqstan-Úndistan kıno jáne mádenıet forýmy 300-den astam kórermendi jınady. Olardyń qataryna dıplomatııalyq korpýs ókilderi, Úndistan kınematografııasynyń óner qaıratkerleri, jas jáne jańadan bastaǵan kınematografıster boldy.
Forým qonaqtaryna Abaı Qunanbaıulynyń hındı tiline aýdarylǵan «Qara sózder» týyndysy taratyldy.
Sonymen qatar Haıdarabad qalasynda (Telangana shtaty) belgili qazaqstandyq rejısser Aqan Sataevtyń qazaq halqynyń jońǵarlarǵa qarsy azattyq soǵysy týraly baıandaıtyn «Jaýjúrek myń bala» kartınasy kórsetildi.
