Búgingi tańda «Qazaqanımasııa» shyǵarmashylyq birlestigi konkýrstyq negizde respýblıkanyń iri qalalarynan málimdelgen 167 ssenarıı ishinen úzdik jıyrmasyn tańdap, 5 mınýttyq anımasııalyq kartınalardan turatyn 20 jobany aıaqtap úlgerdi. Osyǵan oraı Qazaqstannyń Mádenıet jáne sport mınıstri Dáýren Abaev «Qazaqanımasııa» shyǵarmashylyq birlestiginiń jumysymen tanysyp, anımasııa ónerin órkendetýge atsalysqan birqatar ardagerdi marapattady.
– 2022 jyl ulttyq anımasııalyq kıno óneri úshin aıtýly jyl boldy. Sebebi bıyl qazaq anımasııalyq kıno ónerine 55 jyl toldy. 1967 jyly qazaq mýltıplıkasııasynyń negizin qalaǵan uly rejısser Ámen Qaıdardyń «Qarlyǵashtyń quıryǵy nege aıyr?» atty tuńǵysh fılminen bastaý alǵan qazaq anımasııalyq kıno óneri jas urpaqqa jarty ǵasyrdan astam ýaqyt boıy tolassyz qyzmet etýmen keledi. Osy jarty ǵasyrdan astam ýaqyt ishinde 200-den astam mýltfılm túsirilip, 30-dan asa anımasııalyq stýdııa ómirge kelgen eken. Bul ult bolashaǵy úshin jasalǵan teńdessiz jumys, aýqymdy eńbek dep esepteımiz. 2018 jyly anımasııalyq kınostýdııalar qaýymdastyǵy qurylyp, óz kezeginde rýhanı mádenı mańyzy bar kóptegen is-sharany atqaryp keledi, – dedi Mádenıet jáne sport mınıstri Dáýren Abaev quttyqtaý sózinde.
Sondaı-aq bıyl qazaq anımasııalyq shyǵarmashylyq birlestiginiń uıytqy bolýymen Almaty, Astana, Shymkent, Túrkistan, Petropavl qalalarynda ornalasqan 20 stýdııanyń árqaısysy 20 anımasııalyq jobaǵa ıe boldy. Munyń barlyǵy ulttyq anımasııany qoldaý jolynda qolǵa alynǵan iri jobalar-tuǵyn. «Ult bolashaǵy – urpaq tárbıesinde», anımasııalyq fılmderdi memleket múddesimen ushtastyra otyryp óskeleń urpaqqa ulttyq rýh pen rýhanı qundylyqtardy dáripteý isi tolassyz atqaryla bermek. Dáýren Áskerbekuly anımasııanyń obraz qalyptastyratynyn aıryqsha atap ótti. Bala boıyna el tarıhynyń, ulttyq dástúr men tól mádenıettiń obrazy anımasııa arqyly sińedi. Tárbıe osylaı bastaý alady. Sol sebepti anımasııany memleket tarapynan qoldaý jyl saıyn kúsheıe túsýi kerek.
Is-shara barysynda Mádenıet mınıstri anımasııa ardagerlerine marapattar men Alǵyshattar tabys etti. «Eńbek ardageri» medalimen kınorejısser-mýltıplıkatorlar Gúlmıra Sadyqova men Galına Dýsenko jáne sýretshi-mýltıplıkator Ernst Beıseıtov marapattaldy.
Budan basqa, osy jyldyń 19 qyrkúıegi men 4 qarashasy aralyǵynda «Qazaqanımasııa» sheńberinde ótkizilgen sheberlik synyptarynyń tyńdaýshylary jáne Polsha, Fransııa, Túrkııa, Ispanııa sekildi alys shetelderde sheberlik synyptary men praktıkalyq sabaqtardan ótken tyńdaýshylarǵa arnaıy sertıfıkattar tabystaldy. Mádenıet mınıstrine «Qazaqanımasııa» shyǵarmashylyq birlestigi aıasynda jasalǵan 20 joba tanystyryldy. Sonymen qatar qazaqstandyq mýltıplıkatorlar anımasııa salasyndaǵy halyqaralyq áriptesterimen memorandýmdarǵa qol qoıdy.
Aldaǵy jyly ulttyq anımasııa óneriniń atasy Ámen Qaıdardyń týǵanyna 100 jyl tolmaq. Sonyń aıǵaǵyndaı osynaý ǵasyrlyq mereıtoı qarsańynda «Qazaqanımasııa» shyǵarmashylyq birlestiginde Ulttyq kınony qoldaý memlekettik ortalyǵynyń tapsyrysymen «Ámen aǵanyń ǵajaıyp báıteregi» atty qysqametrajdy mýltfılm túsirildi.
