Fılıaldyń resmı ashylý rásimine EUÝ-dyń ǵylym, kommersııalandyrý jáne ınternasıonaldandyrý jónindegi prorektory Janna Qurmanǵalıeva, Osh memlekettik ýnıversıtetiniń rektory Qudaıberdi Qojobekov, Qazaqstannyń Osh qalasyndaǵy konsýly Muhtar Káribaı, oqytýshylar men stýdentter qatysty.
«EUÝ fılıalynyń ashylýy baýyrlas elder arasyndaǵy dostyq pen tatý kórshiliktiń, bilim jáne ǵylymmen qatar barlyq salada yntymaqtastyqty arttyrýǵa ózara umtylystyń nátıjesinde múmkin bolyp otyr. Fılıal Qazaqstan men Qyrǵyzstannyń eń daryndy stýdentteri men ǵalymdaryn tartady dep úmittenemin. Bul baǵytta EUÝ halyqaralyq bilim berý naryǵynda óziniń básekege qabilettiligin turaqty túrde arttyryp keledi. Bizdiń ýnıversıtet QS World University Ranking reıtınginde álemniń úzdik 300 joǵary oqý oryndarynyń qataryna kirip, 277-oryndy ıelendi. Jaqynda EUÝ-ǵa zertteý ýnıversıteti mártebesi berildi. Bul óz kezeginde ǵylymı-akademııalyq kollaborasııa múmkindikterin keńeıtedi», dep atap ótti J.Qurmanǵalıeva.
Búginde EUÝ fılıalynda 30-ǵa jýyq stýdent bilim alyp jatyr. Olar aǵashqy eki kýrsty Osh qalasynda, keıingi eki jylda Qazaqstanda tańdaǵan kásipterin meńgeredi. Oqý baǵdarlamasy aıasynda qyrǵyz jastary qazaq tilin meńgerýde. Kelesi jyly «Qazaqstan tarıhy» pánin engizý josparda bar. Fılıalda joǵary kásibı bilim berýdiń eki baǵyty boıynsha mamandar daıarlaý júrgiziledi: «Aýdarma isi» jáne «Orys tili men ádebıeti». Aldaǵy ýaqytta jaratylystaný ǵylymy, fızıka jáne IT baǵytynda bilim berý baǵdarlamalarynyń sanyn kóbeıtý josparlanyp otyr.
EUÝ ǵylymı-bilim berý jobalar, akademııalyq utqyrlyq baǵdarlamalar, birlesken bilim berý baǵdarlamalary, sheteldik mamandardy tartý boıynsha qyrǵyz áriptesterimen birlese belsendi jumys júrgizedi.
Bıylǵy oqý jylynda ýnıversıtettiń «Welcome to ENU» akademııalyq utqyrlyq baǵdarlamasy aıasynda Qyrǵyzstannan 46 stýdent bilim alýda. Aıta ketý kerek, búginde L.N.Gýmılev atyndaǵy EUÝ-dyń álem boıynsha 12 ortalyǵy men ókildigi bar. Sondaı-aq ulttyq ýnıversıtet 450-den asa jetekshi sheteldik ýnıversıtettermen halyqaralyq yntymaqtastyq ornatqan.
