Mundaǵy basty maqsat – turaqtylyq pen ultaralyq kelisimdi nyǵaıtý. Elimizdiń mádenıetaralyq jetistikterimen bólisý, sondaı-aq Qazaqstanda turatyn etnostardyń ádet-ǵurpy, salt-dástúri men mádenıetine qurmetpen qaraýǵa tárbıeleý.
Astana qalasyndaǵy koreı etnosynyń etnomádenı birlestigi shyǵarmashylyq ujymdary uıymdastyrǵan sharaǵa Ońtústik Koreıanyń Qazaqstandaǵy turaqty jáne ókiletti elshisi Ký Hong-Sok jınalǵan jurtshylyqty Táýelsizdik merekesimen quttyqtap, ıgi tilegin bildirdi.
«Bul jyly koreı etnosynyń Qazaqstanǵa qonystanǵanyna 85 jylyn toılaýy maǵan ótkenge kóz júgirtýge múmkindik berdi. Sonaý qıyn-qystaý zamanda taǵdyr-talaıymen Qazaqstanǵa tentirep kelgen koreı halqyn qushaq jaıa qarsy alyp, baýyryna basyp, qolyndaǵy bir úzim nanymen bólisti. Osy bir qysyltaıań shaqtaǵy aýyrtpashylyqta qol sozǵan qazaq halqyna rızashylyǵymyzdy bildiremiz. Qazir Qazaqstan azamaty retinde eldiń damýynda ıyq tirese jumys istep, úles qosyp jatyr», deıdi Ký Hong-Sok.
Keshke qalalyq ishki saıasat basqarmasynyń basshysy Dáýren Babamuratov, ishki saıasat basqarmasynyń orynbasary Lázzat Qusaıynova qatysty.
Qaıyrymdylyq konsertinde halyqaralyq baıqaýlardyń laýreattary «Art music» toby, Máskeý kameralyq fılarmonııasynyń jáne Nıý-Iork qalasynyń «Jańa dáýir – jańa esimderi» jobasynyń solısi Ten Ilona, «Salmýnorı» barabanshylar toby óner kórsetti.
Uıymdastyrýshylardyń aıtýynsha, jınalǵan qarjy qıyn ómirlik jaǵdaıǵa tap bolǵan eńbek ardageriniń ıgiligine jumsalady.
Zeıin ERǴALI,
«Egemen Qazaqstan»
